លោក សាមុត សុធារិទ្ធ អភិបាលរងនៃគណ:អភិបាលខេត្តព្រះសីហនុ បានអញ្ជើញជាអធិបតីក្នុងពិធីបង្ហាញគម្រោងថ្មី និងពិធីចុះហត្ថលេខាលើកិច្ចសន្យាផ្តល់អាជ្ញាប័ណ្ណពិសេស (Franchise Agreement) សម្រាប់ការបើកសាខាថ្មីរបស់ភោជនីយដ្ឋាន យី សាង (YI SANG) នៅក្រុងព្រះសីហនុ.
(ខេត្តព្រះសីហនុ):នារសៀលថ្ងៃទី១៧ ខែតុលា ឆ្នាំ២០២៦ លោក សាមុត សុធារិទ្ធ អភិបាលរងនៃគណ:អភិបាលខេត្តព្រះសីហនុ តំណាងដ៏ខ្ពង់ខ្ពស់ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានអញ្ជើញជាអធិបតីក្នុងពិធីបង្ហាញគម្រោងថ្មី និងពិធីចុះហត្ថលេខាលើកិច្ចសន្យាផ្តល់អាជ្ញាប័ណ្ណពិសេស (Franchise Agreement) សម្រាប់ការបើកសាខាថ្មីរបស់ភោជនីយដ្ឋាន យី សាង (YI SANG) ក្នុងក្រុងព្រះសីហនុ ពិធីនេះប្រារព្ធឡើងនៅសណ្ឋាគារឃ្វីនកូ ស្ថិតនៅសង្កាត់៣ ដោយមានការអញ្ជេីញចូលរួមពីភ្ញៀវជាតិ-អន្តរជាតិជាច្រេីនរូប។
ថ្លែងក្នុងពិធីនេះលោកឧកញ៉ា លូ ម៉េង សហស្ថាបនិក និងជាអគ្គនាយកក្រុមហ៊ុន Almond Hospitality ដ៏ល្បីល្បាញនៅកម្ពុជាបានមានប្រសាសន៍ថា ភោជនីយដ្ឋាន Yi Sang គឺជាម៉ាកយីហោឈានមុខគេរបស់ក្រុមហ៊ុន Almond Hospitality ដែលល្បីល្បាញខាងម្ហូបកាតាំង និងការរួមបញ្ចូលរសជាតិម្ហូបបែបខ្មែរជាដេីម ត្រូវបានបង្កេីតឡេីងក្នុងឆ្នាំ២០០៨ នៅរាជធានីភ្នំពេញ ភោជនីយដ្ឋាននេះមានសាខាចំនួន ៧ រួមមាន៖ សាខាសុធារស, តំបន់សេដ្ឋកិច្ចពិសេសភ្នំពេញ, ចតុមុខ, បឹងកេងកង, ផ្សារទំនើបអ៊ីអនម៉ល ១, ផ្សារទំនើបអ៊ីអនម៉ល ២ និងសាខាទួលគោក។ ទន្ទឹមនឹងនោះក្រុមហ៊ុនក៏មានភោជនីយដ្ឋានល្បីដែលមានម៉ាកយីហោ Pepe (រួមទាំង Pepe Artisan Food និង Pepe Steakhouse) បំរេីម្ហូបប្រភេទសាច់ស្លេក និងម្ហូបអឺរ៉ុប ដែលបានចាប់ផ្តើមដំណើរការនៅកម្ពុជាតាំងពីប្រហែលឆ្នាំ ២០១៤ (មានអាយុកាលជាង ១០ ទៅ ១៤ ឆ្នាំ) ដោយត្រូវបានបង្កើត ឡើង និងគ្រប់គ្រងដោយម្ចាស់ជនជាតិស៊ែប៊ី ដែលមានជំនាញខាងសាច់អាំងផងដែរ។ហេីយការចុះហត្ថលេខាលើកិច្ចព្រមព្រៀងសិទ្ធិអាជីវកម្មនៅពេលនេះ គឺជាការពង្រីកខ្លួនបន្ថែមនូវសក្តានុពលបែបសេវាកម្មផ្នែកម្ហូបអាហារដ៏សំបូរបែបមួយថ្មីទៀតក្នុងទីក្រុងព្រះសីហនុសំរាប់ទាក់ទាញភ្ញៀវបរទេស ជាពិសេសជនជាតិចិនតែម្តងដែលរសនៅទីក្រុងឆ្នេរដ៏ស្រស់ស្អាតមួយនេះ។
លេីសពីនេះភោជនីយដ្ឋាន Yi Sang ផ្តល់ជូននូវមុខម្ហូបឌីមសាំថ្មីៗ ជាពិសេសគឺសាវម៉ៃ និងសាច់ខ្វៃពិសេសរបស់ជនជាតិចិនបែបកាតាំង ដូចជាទាខ្វៃទឹកឃ្មុំ ដែលផ្សំឡេីងដោយរូបមន្តពិសេសប្រចាំត្រកូលរបស់លោក លូ។ YI SANG ក៏មានមុខម្ហូបច្នៃប្រឌិតជាច្រេីនមុនទៀតរួមមាន ហាកាវម្រេចខ្ចី ស៊ាវឡុងប៉ាវម្រេចស និងនំឆៃថាវម្រេចក្រហម ជាដេីម ដែលត្រូវបានធ្វេីឡេីងដោយសម្រិតសម្រាំងព្រមទាំងគិតគូរអំពីគុណភាពអាហារ និងសុខភាពរបស់អ្នកទទួលទានយ៉ាងយកចិត្តទុកដាក់បំផុត។
ពីវេទិកាអធិបតី លោក សាមុត សុធារិទ្ធ អភិបាលរងខេត្តព្រះសីហនុបានមានប្រសាសន៍ថា តាងនាមអោយរដ្ឋបាល ខេត្តព្រះសីហនុ លោកពិតជាមានសេចក្តីសោមនស្សរីករាយដែល បានចូលរួមក្នុងពិធី ចុះហត្ថលេខា លើកិច្ចព្រមព្រៀងសិទ្ធអាជីវកម្មរបស់ ភោជនីយដ្ឋាន យី សាង (YI SANG) នៃក្រុមហ៊ុន ហសភីផលលីធី ខនសិប ឯ ក (Hospitality Concept Co.Ltd) នាពេលនេះ ។ ហេីយក៏សូមអបអរសារទរចំពោះពីធីចុះហត្ថលេខាលើកិច្ច ព្រមព្រៀងសិទ្ធអាជីវកម្មរបស់ភោជនីយដ្ឋាន យី សាង(YI SANG) នៅលើទឹកដីតំបន់ឆ្នេរដ៏ស្រស់បំព្រង នៃខេត្តព្រះសីហនុ ដែលត្រូវបានប្រសិទ្ធនាមថាជា តារារះនាទិសនិរតី និងកំពុង បំពេញតួនាទីជាតំបន់ប៉ូលសេដ្ឋកិច្ចដ៏មានសារៈសំខាន់ និងជាខេត្តស្នួល នៃតំបន់ឆ្នេរសមុទ្រកម្ពុជា ក្នុងការជំរុញ ការអភិវឌ្ឍសង្គម និងសេដ្ឋកិច្ច ដោយមានការចូលរួមពី គ្រប់វិស័យពាក់ពន្ធ័។
លោកបានបន្ថែមទៀតថា ពិធីសម្ពោធនេះជាសក្ខីភាពថ្មីមួយទៀតដែលបង្ហាញ អោយឃើញច្បាស់ពិការជឿជាក់របស់វិនិយោគិន លើរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតដ៏ខ្ពង់ខ្ពស់របស់ សម្តេច មហាបររធិបតី ហ៊ុន ម៉ាណែត នាយករដ្ឋមន្ត្រីនៃ ព្រះរាជាណាចក្រកម្ពុជា ។
ផ្សាយ:ថ្ងៃទី១៧ ខែតុលា ឆ្នាំ២០២៦
ដោយ:សៅ វាសនា(HarryVS)
