សំណង់របងរំលោភដីចំណីផ្លូវសាធារណៈនៅបុរីចម្ការដូងចាស់កំពុងបង្កការព្រួយបារម្ភយ៉ាងខ្លាំងដល់ប្រជាពលរដ្ឋ
ភ្នំពេញ៖ ប្រជាពលរដ្ឋដែលរស់នៅក្នុងបុរីចម្ការដូងចាស់ ភូមិសំបូរ សង្កាត់ដង្កោ ខណ្ឌដង្កោ កំពុងទទូចសុំឱ្យអាជ្ញាធរមានសមត្ថកិច្ច និងស្ថាប័នពាក់ព័ន្ធ មេត្តាចុះអន្តរាគមន៍ជាបន្ទាន់ ចំពោះករណីសំណង់របងមួយកន្លែងដែលត្រូវបានសាងសង់រំលោភចូលលើដីចំណីផ្លូវសាធារណៈយ៉ាងរឹងមាំ។
បញ្ហាប្រឈមធ្ងន់ធ្ងរដែលប្រជាពលរដ្ឋកំពុងជួបប្រទះ៖
- ផ្លូវរួមតូច និងគ្រោះថ្នាក់ចរាចរណ៍៖ ការសាងសង់របងរំលោភយកដីផ្លូវនេះ បានធ្វើឱ្យផ្លូវធ្វើដំណើរមានសភាពចង្អៀត ដែលបង្កជាហានិភ័យនៃគ្រោះថ្នាក់ចរាចរណ៍ជារៀងរាល់ថ្ងៃ ជាពិសេសដល់សិស្សានុសិស្ស។
- ការខូចខាតលំនៅឋាន៖ សំណង់នេះបានបង្កឱ្យមានបញ្ហាទឹកហូរជ្រាបចូលក្នុងផ្ទះប្រជាពលរដ្ឋដែលរស់នៅជុំវិញយ៉ាងធ្ងន់ធ្ងរ។
- ការគាបសង្កត់លើប្រជាពលរដ្ឋ៖ តាមប្រភពពីប្រជាពលរដ្ឋបានឱ្យដឹងថា ម្ចាស់គម្រោងបុរីបានបង្ខំឱ្យម្ចាស់ផ្ទះដែលទិញបុរីនេះ ធ្វើកិច្ចសន្យាឈប់ឱ្យមានការតវ៉ា ឬរអ៊ូរទាំជុំវិញបញ្ហានេះ ដែលនេះគឺជាការរំលោភលើសិទ្ធិអ្នកទិញយ៉ាងធ្ងន់ធ្ងរ។
ឥរិយាបថចំពោះអ្នកសារព័ត៌មាន៖
ថ្មីៗនេះ នៅពេលក្រុមការងារអ្នកសារព័ត៌មានបានទំនាក់ទំនងសុំការបំភ្លឺ ម្ចាស់សំណង់មិនត្រឹមតែមិនបកស្រាយដោយសុឆន្ទៈប៉ុណ្ណោះទេ ប៉ុន្តែថែមទាំងប្រើសម្តីមិនសមរម្យដាក់អ្នកសារព័ត៌មានដែលកំពុងបំពេញការងារតាមវិជ្ជាជីវៈទៅវិញ។
សំណើសុំអន្តរាគមន៍ជាបន្ទាន់៖
ក្នុងនាមប្រជាពលរដ្ឋដែលរងគ្រោះ យើងខ្ញុំសូមគោរពស្នើសុំការអន្តរាគមន៍យ៉ាងទទូចពី៖
១. ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ។
២. លោកស្រី គឹម ញឹប អភិបាលនៃគណៈអភិបាលខណ្ឌដង្កោ។
៣. ឯកឧត្តម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់៖ សូមឯកឧត្តមមេត្តាដាក់មន្ត្រីជំនាញចុះមកត្រួតពិនិត្យ និងវាយតម្លៃផ្លូវមួយខ្សែនេះឱ្យបានច្បាស់លាស់។ ការសាងសង់រំលោភបុកគ្រឹះរឹងមាំលើដីចំណីផ្លូវរដ្ឋ ដើម្បីធ្វើជាកម្មសិទ្ធិផ្ទាល់ខ្លួនដោយបុគ្គលដែលមានលុយ និងអំណាចបែបនេះ គឺជារឿងដែលមិនអាចលើកលែងបានឡើយ។
ជំហររបស់អង្គភាពសារព័ត៌មាន៖
អង្គភាពសារព័ត៌មានយើងខ្ញុំ សូមបញ្ជាក់យ៉ាងច្បាស់ថា ការចុះផ្សាយនេះគឺធ្វើឡើងក្នុងគោលបំណងត្រឹមតែជា «កញ្ចក់ឆ្លុះបញ្ចាំង» នូវការពិតនៅក្នុងសង្គមតែប៉ុណ្ណោះ ដោយគ្មានចេតនាញុះញង់ ឬបង្កអរិភាពដល់ភាគីណាមួយឡើយ។ យើងខ្ញុំគ្រាន់តែជាអ្នកនាំពាក្យពីប្រជាពលរដ្ឋទៅកាន់រាជរដ្ឋាភិបាល និងពីស្ថាប័នរដ្ឋមកកាន់ប្រជាពលរដ្ឋវិញ ហើយយើងខ្ញុំរង់ចាំការបកស្រាយបំភ្លឺពីសំណាក់អាជ្ញាធរ និងម្ចាស់សំណង់គ្រប់ពេលវេលា ដើម្បីធានាបាននូវតុល្យភាពព័ត៌មាន។
យើងសង្ឃឹមយ៉ាងមុតមាំថា ថ្នាក់ដឹកនាំទាំងអស់នឹងមេត្តាចាត់វិធានការតាមផ្លូវច្បាប់ ដើម្បីទាមទារយកដីចំណីផ្លូវសាធារណៈត្រឡប់មកវិញ និងធានាសុវត្ថិភាពដល់ប្រជាពលរដ្ឋ។
ថ្ងៃទី ១៤ ខែកក្កដា ឆ្នាំ ២០២៦
