លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញជាអធិបតី ក្នុងពិធីសំណេះសំណាល សួរសុខទុក្ខ ដល់កងកម្លាំងនគរបាលនៃអធិការដ្ឋាននគរបាលស្រុកស្អាង។
(ខេត្តកណ្តាល): នៅរសៀលថ្ងៃចន្ទ ១០រោច ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៧ ខែកញ្ញា ឆ្នាំ២០២៦ ដោយអនុវត្តតាមបទបញ្ជាចង្អុលដឹកនាំដ៏ខ្ពង់ខ្ពស់ របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញជាអធិបតី ក្នុងពិធីសំណេះសំណាល សួរសុខទុក្ខ ដល់កងកម្លាំងនគរបាលនៃអធិការដ្ឋាននគរបាលស្រុកស្អាង នៅសាលប្រជុំអធិការដ្ឋាននគរបាលស្រុកស្អាង។
នាឱកាសនោះផងដែរ លោកឧត្តមសេនីយ៍ទោស្នងការ បានបង្ហាញពីគោលបំណងអំពីការចុះត្រួតពិនិត្យតាមប៉ុស្តិ៍នេះ គឺដើម្បីស្វែងយល់អំពីជីវភាពជាក់ស្តែងនៃរបៀបរបបការងាររបស់ប៉ុស្តិ៍នីមួយៗ ហើយដើម្បីជួយបំពេញបន្ថែមនូវចំណុចខ្វះខាត និងកែលំអឱ្យបានកាន់តែល្អប្រសើរបន្ថែមទៀត។
ជាមួយគ្នាដែរ លោកឧត្តមសេនីយ៍ទោស្នងការបានណែនាំដល់លោកអធិការនគរបាលស្រុកស្អាង និងលោកនាយប៉ុស្តិ៍នគរបាលចំណុះទាំង១២ ត្រូវរៀបចំកន្លែងស្នាក់នៅនៅតាមបុស្តិ៍នីមួយៗឱ្យបានសមរម្យ និងត្រូវដាច់ដោយឡែកពីអគារបំពេញការងារ រួមទាំងដាក់កាំមេរ៉ាសុវត្ថិភាពក្នុងទីតាំងប៉ុស្តិ៍ឱ្យបានគ្រប់ៗប៉ុស្តិ៍។
បន្ថែមពីនេះ លោកឧត្តមសេនីយ៍ទោស្នងការ បានណែនាំដល់គ្រប់ប៉ុស្តិ៍ទាំងអស់ត្រូវតែយកចិត្តទុកដាក់លើការងារដូចខាងក្រោម៖
-ត្រូវទទួលពាក្យបណ្តឹងរបស់ប្រជាពលរដ្ឋទោះបីជាកើតហេតុនៅក្រៅដែនសមត្ថកិច្ចរបស់ខ្លួនក៏ដោយ
-ត្រូវផ្តល់សេវាជូនប្រជាពលរដ្ឋប្រកបដោយសីលធម៌ ឥរិយាបថ សុភាពរាបសារ តែការងារមុឺងម៉ាត់ជាមួយប្រជាពលរដ្ឋ
-ត្រូវតែបន្តយកចិត្តទុកដាក់អនុវត្តគោលនយោបាយភូមិ ឃុំ សង្កាត់ មានសុវត្ថិភាព ឱ្យកាន់តែល្អប្រសើរថែមទៀត រួមទាំងការងារល្បាតពួនស្ទាក់ រៀបចំផែនការប្រទាក់ក្រឡារវាងប៉ុស្តិ៍និងប៉ុស្តិ៍ជាប់ព្រំប្រទល់ ដើម្បីបង្ការទប់ស្កាត់បទល្មើស
-ត្រូវគ្រប់គ្រងមុខសញ្ញាទាំងចាស់ និងថ្មី ឱ្យបានច្បាស់លាស់ (មុខសញ្ញាបទល្មើសព្រហ្មទណ្ឌ គ្រឿងញៀន រួមទាំងក្មេងទំនើង)
-ត្រូវតែមានកិច្ចសហការនិងទំនាក់ទំនងល្អជាមួយអាជ្ញាធរមូលដ្ឋាន។
ជាចុងក្រោយ លោកឧត្តមសេនីយ៍ទោស្នងការបានពាំនាំប្រសាសន៍ផ្តាំផ្ញើសួរសុខទុក្ខ និងឧបត្ថម្ភនូវគ្រឿងឧបភោគបរិភោគរួមមានអង្ករ១តោន ទឹកសុទ្ធ២០កេស មី២០កេស ត្រីខ១កេស រួមទាំងថវិកាដែលជាអំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ជូនដល់អធិការដ្ឋាននគរបាលស្រុកស្អាងផងដែរ។
ផ្សាយ:ថ្ងៃទី៧ ខែកញ្ញា ឆ្នាំ២០២៦
ដោយ:សៅ វាសនា(HarryVS)
📷ស្នងការដ្ឋាននគរបាលខេត្តកណ្តាល
