ឯកឧត្តម សុខ ប្រសិទ្ធិ រដ្ឋលេខាធិការក្រសួងអញ្ជើញដឹកនាំកិច្ចប្រជុំបូកសរុប របាយការណ៍សកម្មភាពក្រុមមេធាវីប្រចាំក្រសួងព័ត៌មាន និងលើក ទិសដៅការងារបន្តឆ្នាំ២០២៦ និងពិភាក្សាបញ្ចូលធាតុចូល នៃ ច្បាប់ស្តីពីរបបសារព័ត៌មានថ្មី.
(ភ្នំពេញ): ឯកឧត្តម សុខ ប្រសិទ្ធិ រដ្ឋលេខាធិការក្រសួងព័ត៌មាន នារសៀលថ្ងៃទី៣១ ខែតុលា ឆ្នាំ២០២៥ អញ្ជើញដឹកនាំកិច្ចប្រជុំបូកសរុប របាយការណ៍សកម្មភាពក្រុមមេធាវីប្រចាំក្រសួងព័ត៌មាន និងលើកទិសដៅការងារបន្តឆ្នាំ២០២៦ និងពិភាក្សាបញ្ចូលធាតុចូល នៃ ច្បាប់ស្តីពីរបបសារព័ត៌មានថ្មី នៅសាលព្រះវិហារ ទីស្តីការ ក្រសួងព័ត៌មាន។
កិច្ចប្រជុំនេះបានចាប់ផ្តើមដោយការពិនិត្យ និងវាយតម្លៃ ទៅលើរបាយការណ៍សកម្មភាពប្រចាំរបស់ក្រុមមេធាវី ក្រសួង ដែលបានបង្ហាញអំពីវឌ្ឍនភាពនៃការងារច្បាប់ ដែលសម្រេចបានក្នុងរយៈពេលកន្លងមក។ ក្នុងនោះ ក្រុមមេធាវីបានបំពេញតួនាទីយ៉ាងសកម្មក្នុងការ ផ្តល់ យោបល់ផ្នែកច្បាប់ ការ ពិនិត្យលិខិតបទដ្ឋានគតិយុត្ត និងការ ការពារផលប្រយោជន៍ស្របច្បាប់ របស់ក្រសួង នៅចំពោះមុខអង្គការតុលាការ និងស្ថាប័នពាក់ព័ន្ធ។
ឯកឧត្តមបណ្ឌិត សុខ ប្រសិទ្ធិ បានថ្លែងកោតសរសើរ ចំពោះកិច្ចខិតខំប្រឹងប្រែងទាំងនេះ ដែលបានចូលរួម ចំណែកយ៉ាងធំធេងក្នុងការធានានូវភាពត្រឹមត្រូវតាមផ្លូវ ច្បាប់រាល់សកម្មភាពរបស់ក្រសួង។ របៀបវារៈដ៏សំខាន់ និងជាចំណុចគន្លឹះនៃកិច្ចប្រជុំ គឺការ ផ្តោតលើការរៀបចំផែនការបញ្ចូលធាតុច្បាប់ថ្មីទៅក្នុង សេចក្តីព្រាងច្បាប់ស្តីពីរបបសារព័ត៌មាន។ ការងារនេះ មានសារៈសំខាន់ជាយុទ្ធសាស្ត្រក្នុងការ ធ្វើទំនើបកម្ម ច្បាប់សារព័ត៌មានរបស់កម្ពុជាឱ្យស្របទៅនឹងការវិវឌ្ឍ នៃបច្ចេកវិទ្យាឌីជីថល (Digitalization) និងការ កើនឡើងកាន់តែច្រើនរបស់ជនអគតិដែលតែងតែ ញុះញង់ឱ្យសង្គមរីកររខ្លាំងបំផុត នៃព័ត៌មានក្លែងក្លាយ (Fake News) ។
ឯកឧត្តមបណ្ឌិត សុខ ប្រសិទ្ធិ បានបញ្ជាក់ថា ធាតុច្បាប់ ថ្មីត្រូវតែធានា៖
– ភាពទទួលខុសត្រូវៈ ធ្វើយ៉ាងណាឱ្យទាំងប្រព័ន្ធ ផ្សព្វផ្សាយបុរាណ និងប្រព័ន្ធផ្សព្វផ្សាយថ្មី (បណ្តាញ សង្គម) អាចប្រកាន់ខ្ជាប់នូវភាពទទួលខុសត្រូវផ្នែក វិជ្ជាជីវៈ និងច្បាប់។
– ការប្រយុទ្ធប្រឆាំងព័ត៌មានក្លែងក្លាយៈ បង្កើត យន្តការផ្លូវច្បាប់ដ៏មុតស្រួចដើម្បីការពារសន្តិសុខ ព័ត៌មានជាតិ និងទប់ស្កាត់រាល់សកម្មភាពញុះញង់ បង្កចលាចលតាមរយៈព័ត៌មានមិនពិត។
-ការគាំទ្រដល់សេរីភាពសារព័ត៌មានៈ ខណៈពេល ដែលផ្តោតលើការទទួលខុសត្រូវ ច្បាប់ថ្មីត្រូវតែបន្ត លើកកម្ពស់និងការពារសិទ្ធិសេរីភាពសារព័ត៌មាន ប្រកបដោយវិជ្ជាជីវៈ ស្របតាមរដ្ឋធម្មនុញ្ញ និង គោលការណ៍ប្រជាធិបតេយ្យ។
កិច្ចពិភាក្សាបានប្រព្រឹត្តទៅក្រោមបរិយាកាសស្មារតី សហការ និងទទួលខុសត្រូវខ្ពស់។ ឯកឧត្តមបណ្ឌិត សុខ ប្រសិទ្ធិ បានផ្តល់អនុសាសន៍ណែនាំយ៉ាង ម៉ត់ចត់ដល់ក្រុមការងារឱ្យបន្តស្រាវជ្រាវ និងសិក្សា ធាតុចូលពីបទពិសោធន៍អន្តរជាតិ ដើម្បីធានាថាច្បាប់ ថ្មីនឹងមានលក្ខណៈគ្រប់ជ្រុងជ្រោយ និងអាចអនុវត្ត បានប្រកបដោយប្រសិទ្ធភាព។ ការងារនេះត្រូវបាន ចាត់ទុកជាអាទិភាព ដើម្បីរួមចំណែកដល់ការអនុវត្ត នូវ គោលនយោបាយយុទ្ធសាស្ត្របញ្ចកោណ របស់ រាជរដ្ឋាភិបាលអាណត្តិទី ៧ ដែលដឹកនាំដោយ សម្តេច មហាបវរធិបតី ហ៊ុន ម៉ាណែត ដោយមាន សម្តេចតេជោ ជាគ្រឹះរឹងមាំនៃសន្តិភាពដ៏ត្រជាក់ត្រជុំ ជូនពលរដ្ឋគ្រប់ វណ្ណៈនិងជាតិសាសន៍ រស់នៅដោយសុខសាន្ត។
គោលដៅច្បាស់លាស់បន្តសម្រាប់ឆ្នាំ ២០២៦ ផ្អែកលើទិសដៅនៃកិច្ចប្រជុំថ្ងៃទី ៣១ ខែតុលា ឆ្នាំ ២០២៥ ក្រសួងព័ត៌មានបានកំណត់នូវគោលដៅ ច្បាស់លាស់សម្រាប់ជំរុញធាតុច្បាប់ថ្មីស្តីពីរបប សារព័ត៌មានឲ្យសម្រេចបានក្នុងឆ្នាំ ២០២៦ ដូច ខាងក្រោម៖
១. ការបញ្ចប់ការរៀបចំសេចក្តីព្រាងច្បាប់ (Finalization of Draft Law): បញ្ចប់ការពិនិត្យ ពិភាក្សា និងកែសម្រួលលើធាតុច្បាប់ថ្មីទាំងអស់ ដើម្បី រៀបចំ សេចក្តីព្រាងច្បាប់ស្តីពីរបបសារព័ត៌មានថ្មី ឲ្យបានចប់សព្វគ្រប់ និងដាក់ស្នើសុំទៅកាន់ទីស្តីការ គណៈរដ្ឋមន្ត្រីដើម្បីពិនិត្យ និងអនុម័ត នៅត្រីមាសទី ១ ឬទី ២ ឆ្នាំ ២០២៦។
២. ការជំរុញដំណើរការនីតិកម្ម (Legislative Process Acceleration): ជំរុញ និងតាមដាន ដំណើរការនីតិវិធីនៃសេចក្តីព្រាងច្បាប់នេះនៅតាម ស្ថាប័នពាក់ព័ន្ធ (រួមទាំងការបញ្ជូនទៅរដ្ឋសភា និង ព្រឹទ្ធសភា) ក្នុងគោលដៅ អនុម័តច្បាប់ថ្មីនេះជាផ្លូវការ ដើម្បីឲ្យអាចចូលជាធរមានក្នុងអំឡុងឆ្នាំ ២០២៦។
៣. ការអភិវឌ្ឍយន្តការប្រឆាំងព័ត៌មានក្លែងក្លាយ (Anti-Fake News Mechanism): បង្កើតនូវ យន្តការដោះស្រាយបញ្ហាព័ត៌មានក្លែងក្លាយ និងការ ញុះញង់តាមប្រព័ន្ធឌីជីថល ឲ្យមានប្រសិទ្ធភាព ដោយ ភ្ជាប់ទៅនឹងធាតុច្បាប់ថ្មី ដើម្បីអាចឆ្លើយតបនឹងការ គំរាមកំហែងដល់សន្តិសុខព័តមានជាតិ ភ្លាមៗ បន្ទាប់ពី ច្បាប់ចូលជាធរមាន។ ៤. ការពង្រឹងសមត្ថភាពអនុវត្តច្បាប់ (Law Enforcement Capacity Building): រៀបចំ កម្មវិធី បណ្តុះបណ្តាល និងផ្សព្វផ្សាយ អំពីខ្លឹមសារ ច្បាប់ថ្មី និងក្រមសីលធម៌វិជ្ជាជីវៈសារព័ត៌មាន ទៅដល់ អ្នកសារព័ត៌មាន ម្ចាស់ប្រព័ន្ធផ្សព្វផ្សាយ និងមន្ត្រី អនុវត្តច្បាប់ពាក់ព័ន្ធ ឲ្យបានទូលំទូលាយនៅដំណាច់ឆ្នាំ ២០២៦ ដើម្បីធានាការអនុវត្តច្បាប់ដោយត្រឹមត្រូវ និង ប្រកបដោយវិជ្ជាជីវៈ។
គួរបញ្ជាក់ផងដែរថា៖ កិច្ចប្រជុំនារសៀលថ្ងៃទី៣១ ខែតុលា ឆ្នាំ២០២៥ នេះ បានបង្ហាញឱ្យឃើញយ៉ាង ច្បាស់ពីការប្តេជ្ញាចិត្តដ៏មុតមាំរបស់ក្រសួងព័ត៌មាន ក្នុង ការធ្វើកំណែទម្រង់ច្បាប់ដ៏ទូលំទូលាយ។ តាមរយៈការ ពង្រឹងការងាររបស់ក្រុមមេធាវី និងការជំរុញការបញ្ចូល ធាតុច្បាប់ស្តីពីរបបសារព័ត៌មានថ្មី ក្រសួងព័ត៌មាន សង្ឃឹមយ៉ាងមុតមាំថា នឹងអាចកសាងនូវក្របខណ្ឌ ច្បាប់មួយដែលរឹងមាំ ទំនើប និងអាចឆ្លើយតបទៅនឹង បច្ចុប្បន្នភាពនៃវិស័យព័ត៌មាន ព្រមទាំងចូលរួមការពារ តម្លៃស្នូលនៃសន្តិភាព ស្ថេរភាពសង្គម និងការអភិវឌ្ឍ ជាតិប្រកបដោយចីរភាព ក្រោមការដឹកនាំប្រកបដោយ គតិបណ្ឌិតរបស់រាជរដ្ឋាភិបាល។
ផ្សាយ:ថ្ងៃទី៣១ ខែតុលា ឆ្នាំ២០២៥
ដោយ:សៅ វាសនា(HarryVS)
