កម្លាំងជំនាញបញ្ជាការដ្ឋានកងរាជអាវុធហត្ថខេត្តព្រះសីហនុ បើកប្រតិបត្តិការបង្ក្រាបបទល្មើស ឃាត់ខ្លួនមនុស្ស១៤៣នាក់ រួមទាំងវត្ថុតាងគ្រឿងញៀនជិត២គីឡូក្រាម.
(ខេត្តព្រះសីហនុ): អនុវត្តតាមបទបញ្ជាដ៏ម៉ឺងម៉ាត់របស់ លោក ឧត្តមសេនីយ៍ត្រី ហេង ប៊ុន ទី មេបញ្ជាការ កងរាជអាវុធហត្ថខេត្តព្រះសីហនុ កាលពីរសៀលថ្ងៃទី២៨ ខែវិច្ឆិកា ឆ្នាំ២០២៥ កម្លាំង ជំនាញនៃការិយាល័យប្រឆាំងគ្រឿងញៀន មន្ទីរស្រាវជ្រាវនិង បង្ក្រាបបទល្មើស កងរាជអាវុធហត្ថខេត្តព្រះសីហនុ បានកសាង
សំណុំរឿងបញ្ជូនជនសង្ស័យប្រុស-ស្រី សរុបចំនួន ១៤៣នាក់ រួម នឹងវត្ថុតាងគ្រឿងញៀនជិត២គីឡូក្រាម ដើម្បីចាត់ការតាមនីតិវិធី។
ក្នុងនោះជនសង្ស័យចំនួន១៣នាក់ជនជាតិខ្មែរដែល ជាប់ពាក់ព័ន្ធនឹងករណីជួញដូរនិងប្រើប្រាស់ដោយខុសច្បាប់នៅសារធាតុញៀនបញ្ជូនទៅអយ្យការអមសាលាដំបូងខេត្តព្រះសីហនុ ចំពោះជនសង្ស័យ ចំនួន១២៩នាក់ ជនជាតិខ្មែរ ជាប់ពាក់ព័ន្ធនឹងករណីប្រើប្រាស់ដោយខុសច្បាប់នូវសារធាតុញៀនបញ្ជូនទៅអប់រំកែប្រែនៅមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ស្ថិតនៅភូមិឬទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ ដោយឡែកចំពោះជនសង្ស័យ ចំនួន០១នាក់ ជនជាតិបារាំង ជាប់ពាក់ព័ន្ធនឹងការប្រើប្រាស់ដោយខុសច្បាប់នូវ សារធាតុញៀន រៀបចំនីតិវិធីបណ្ដេញចេញពីប្រទេសកម្ពុជា។
សូមជម្រាបជូនថា ប្រតិបត្តិការបង្ក្រាបមុខសញ្ញាខាងលើនេះធ្វើឡើងក្រោយទទួលបានសេចក្តីរាយការណ៍ពីប្រជាពលរដ្ឋ តាមរយៈកម្មវិធី NoDrug អ.ជ.ប.គ.ញ លេខរាយការណ៍៖ ២៧៦៥ នៅវេលាម៉ោង១២និង១០នាទី ថ្ងៃទី២៤ ខែវិច្ឆិកា ឆ្នាំ២០២៥ លោកឧត្តមសេនីយ៍ត្រី ហេង ប៊ុន ទី មេបញ្ជាការកងរាជអាវុធហត្ថ ខេត្តព្រះសីហនុ បានដឹកនាំកម្លាំងមន្ទីរជំនាញកងរាជអាវុធហត្ថ បើកប្រតិបត្តិការចូលឆ្មក់បង្ក្រាបទីតាំងលក់ដូរនិងចែកចាយគ្រឿងញៀនខុសច្បាប់ ដោយមានការសម្របសម្រួលនីតិវិធីពី លោក ពេញ ពិសិដ្ឋ ព្រះរាជអាជ្ញារងនៃអយ្យការអមសាលាដំបូង ខេត្តព្រះសីហនុ ស្ថិតនៅចំណុចភូមិថ្មី ភូមិ៣ សង្កាត់លេខ៣ ក្រុង ព្រះសីហនុ និងតាមសង្កាត់មួយចំនួន នៅក្នុងក្រុងព្រះសីហនុ៕
ផ្សាយ:ថ្ងៃទី២៩ ខែវិច្ឆិកា ឆ្នាំ២០២៥
ដោយ:សៅ វាសនា(HarryVS)
ប្រភព:បញ្ជាការដ្ឋានកងរាជអាវុធខេត្តព្រះសីហនុផេក
