ផ្ទុះការរិះគន់៖ សង្ស័យមានការបើកដៃឱ្យនាំទំនិញគេចពន្ធឆ្លងដែន នៅច្រករបៀងសំរោង ខេត្តស្វាយរៀង
ខេត្តស្វាយរៀង៖ សកម្មភាពដឹកជញ្ជូនទំនិញឆ្លងដែនទៅមករវាងកម្ពុជា និងវៀតណាម តាមរថយន្តវ៉េអង (V1) ធំៗ ត្រូវបានរាយការណ៍ថា កំពុងកើតមានឡើងយ៉ាងអនាធិបតេយ្យទាំងយប់ទាំងថ្ងៃ នៅចំណុចច្រករបៀងប៉ុស្តិ៍នគរបាលការពារព្រំដែនគោកសំរោង ស្ថិតក្នុងភូមិពោធិ៍ ឃុំមេសរថ្ងក ស្រុកចន្ទ្រា ខេត្តស្វាយរៀង កាលពីថ្ងៃទី ២៥ ខែមិថុនា ឆ្នាំ ២០២៦ កន្លងទៅនេះ។
ផ្អែកលើក្រមសីលធម៌វិជ្ជាជីវៈសារព័ត៌មានក្នុងការស្វែងរកការពិត និងការពារផលប្រយោជន៍សាធារណៈ រូបភាពពីប្រភពសារព័ត៌មានជាច្រើនបានបង្ហាញពីសកម្មភាពដឹកជញ្ជូនទំនិញផ្សេងៗ (រួមទាំងការដឹកសំបកបាវ ឬសម្ភារៈឆ្លងដែន) ដោយសង្ស័យថាមិនមានការត្រួតពិនិត្យ ឬបង់ពន្ធត្រឹមត្រូវឡើយ។ ករណីនេះបានបង្កើតជាមន្ទិលសង្ស័យពីសាធារណជនជុំវិញភាពមិនប្រក្រតី និងការខាតបង់ថវិកាជាតិ។
ដើម្បីតម្លាភាព និងភាពស្អាតស្អំក្នុងជួរមន្ត្រីរាជការ មហាជន និងសារព័ត៌មានសូមគោរពស្នើសុំយ៉ាងទទូចដល់ថ្នាក់ដឹកនាំពាក់ព័ន្ធ រួមមាន៖
- ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង
- លោកឧត្តមសេនីយ៍ទោ ពេជ្យ វីរៈ ស្នងការនៃស្នងការដ្ឋាននគរបាលខេត្តស្វាយរៀង
- លោកឧត្តមសេនីយ៍ត្រី ប៉ាន់ សេរ៉ូ ស្នងការរងទទួលបន្ទុកផែនវីរៈព្រំដែន
មេត្តាជួយចាត់មន្ត្រីជំនាញបើកការស៊ើបអង្កេតជាបន្ទាន់ ដើម្បីស្រាវជ្រាវការពិត និងមានវិធានការច្បាប់ឱ្យបានតឹងរឹង ប្រសិនបើរកឃើញថាមានការគប់គិតទុច្ចរិតណាមួយ ក៏ដូចជាដើម្បីវះកាត់ភាពមិនប្រក្រតី និងការពារចំណូលថវិកាជាតិ។
អនុលោមតាមគោលការណ៍តុល្យភាពព័ត៌មាន យើងខ្ញុំរង់ចាំការបកស្រាយបំភ្លឺពីសាមីខ្លួន ឬសមត្ថកិច្ចពាក់ព័ន្ធគ្រប់ពេល ដើម្បីជម្រះមន្ទិល និងផ្តល់ព័ត៌មានដែលសុក្រឹតបំផុតជូនសង្គមជាតិ។
