ឯកឧត្តម ម៉ាង ស៊ីណេត អភិបាល នៃ គណៈអភិបាលខេត្តព្រះសីហនុ បានអញ្ជើញចុះ ពិនិត្យស្ថានភាពនៃការចិញ្ចឹមត្រីរបស់បងប្អូនប្រជានេសាទ នៅស្រុកស្ទឹងហាវ
(ខេត្តព្រះសីហនុ): នៅរសៀលថ្ងៃទី២៨ ខែមិថុនា ឆ្នាំ២០២៦ ឯកឧត្តម ម៉ាង ស៊ីណេត អភិបាល នៃ គណៈអភិបាលខេត្តព្រះសីហនុ បានអញ្ជើញចុះពិនិត្យស្ថានភាពជាក់ស្តែងនៃការចិញ្ចឹមត្រីរបស់បងប្អូនប្រជានេសាទ នៅស្រុកស្ទឹងហាវ។
ឆ្លៀតក្នុងឨកាសនោះ ឯកឧត្តមអភិបាលខេត្ត ក៏បានធ្វេីការសំណេះសំណាលជាមួយបងប្អូនប្រជានេសាទប្រកបដោយទឹកមុខស្រស់ស្រាយ ជិតស្និទ្ធ និងបានណែនាំដល់បងប្អូនប្រជាពលរដ្ឋដែលរស់នៅតាមតំបន់មាត់ព្រែកឱ្យបង្កើនការប្រុងប្រយ័ត្នខ្ពស់បំផុត ព្រមទាំងបានណែនាំពីរបៀបការពារថែទាំត្រីរបស់ពួកគាត់ និងសុវត្ថិភាពផ្ទាល់ខ្លួន ក្នុងអំឡុងពេលមានភ្លៀង ធ្លាក់ក្នុងរដូវវស្សានេះ។
សូមបញ្ជាក់ថាស្រុកស្ទឹងហាវ ខេត្តព្រះសីហនុ គឺជាតំបន់ឆ្នេរដែលមាន សក្តានុពលសេដ្ឋកិច្ចសំខាន់, ភូមិសាស្ត្រនេះអំណោយផល យ៉ាងខ្លាំងដល់វិស័យនេសាទសមុទ្រ ដែលជាប្រភពចំណូល ចម្បងរបស់ប្រជាពលរដ្ឋក្នុងតំបន់ ទាំងការនេសាទបែបលក្ខណៈគ្រួសារ និងសហគមន៍។
ស្រុកស្ទឹងហាវស្ថិតនៅប៉ែកខាងលិចនៃខេត្តព្រះសីហនុ ដែលមាន ចម្ងាយជាមធ្យមប្រហែល 20 km ពីសាលាក្រុងព្រះសីហនុមានព្រំប្រទល់ខាងជើង ជាប់ស្រុកស្រែអំបិល (ខេត្តកោះកុង)ខាងត្បូង ជាប់ក្រុងព្រះសីហនុខាងកើត ជាប់ស្រុកព្រៃនប់ និងស្រុកកំពង់សិលា។
ផ្សាយ:ថ្ងៃទី២៨ ខែមិថុនា ឆ្នាំ២០២៦
ដោយ:សៅ វាសនា(HarryVS)
📷:ម៉ាងស៊ីណេត/MangSineth
