🚨 រឿងក្តីក្តៅគគុក! ទិញដីមានប្លង់រឹងស្របច្បាប់ ស្រាប់តែត្រូវលុបចោល! អ្នកវិនិយោគចិនសញ្ជាតិខ្មែរ ស្រែករកយុត្តិធម៌ និងស្នើសុំអន្តរាគមន៍បន្ទាន់ពីអភិបាលខេត្តកំពង់ស្ពឺ

​

​(ខេត្តកំពង់ស្ពឺ)​៖ អ្នកវិនិយោគដើមកំណើតចិនសញ្ជាតិខ្មែរម្នាក់ បានដាក់ពាក្យបណ្តឹងផ្លូវការគោរពស្នើសុំកិច្ចអន្តរាគមន៍ពី ឯកឧត្តម ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ លើករណីវិវាទកម្មសិទ្ធិដីធ្លីទំហំជាង ៣០ហិកតា (៣៤០,៨០២ ម៉ែត្រការ៉េ) ស្ថិតនៅភូមិស្បែកព្រាល ឃុំត្រែងត្រយឹង ស្រុកភ្នំស្រួច ដែលលោកអះអាងថា ត្រូវបានរដ្ឋបាលសុរិយោដីមោឃៈប័ណ្ណកម្មសិទ្ធិរបស់លោក ទាំងដែលសំណុំរឿងកំពុងស្ថិតក្នុងចំណាត់ការរបស់តុលាការ។

​យោងតាមពាក្យបណ្តឹងលេខ ២៣៩៦ ចុះថ្ងៃទី១១ ខែសីហា ឆ្នាំ២០២៦ លោក ឆឹង សឺហ្វីង បានបញ្ជាក់ថា លោកបានទិញដីចំនួន ០៤ក្បាលដី (លេខ ០៥១៤, ០៥១៥, ០៥១៦ និង ០៥១៧) ពីឈ្មោះ ទឹង ចាន់ណា ក្នុងតម្លៃជាង ៨២ម៉ឺនដុល្លារ តាំងពីចុងឆ្នាំ២០២៣ ដោយមានការចុះហត្ថលេខាទទួលស្គាល់ពីអាជ្ញាធរមូលដ្ឋាន និងបានចុះបញ្ជីចេញប័ណ្ណកម្មសិទ្ធិស្របច្បាប់រួចរាល់។

​ទោះជាយ៉ាងណា ក្រោយមកមានការចេញដីកាសម្រេចរក្សាការពារ (លេខ ១៤៥(ក) ចុះថ្ងៃទី១១ មីនា ២០២៤) ពីសាលាដំបូងខេត្តកំពង់ស្ពឺ តាមការស្នើសុំរបស់ឈ្មោះ លឹម សូរីតា (ជាភរិយាឈ្មោះ ប៉េង ពោធ៌នា)។ ខណៈលោកកំពុងតតាំងក្តីនៅតុលាការ ស្រាប់តែក្រសួងរៀបចំដែនដី នគរូបនីយកម្ម និងសំណង់ បានចេញលិខិតលេខ ២៨៣ ដនស/ខុទ្ទ ចុះថ្ងៃទី០៣ ខែកុម្ភៈ ឆ្នាំ២០២៦ សម្រេចមោឃៈប័ណ្ណកម្មសិទ្ធិរបស់លោក ដោយសំអាងលើការកសាងប័ណ្ណខុសនីតិវិធី ហើយតម្រូវឱ្យចេញប័ណ្ណថ្មីជូនឈ្មោះ លឹម សូរីតា ទៅវិញ។

​ជុំវិញភាពចម្រូងចម្រាសនេះ តាមរយៈពាក្យបណ្តឹង លោក ឆឹង សឺហ្វីង បានលើកឡើងនូវចំណុចស៊ីជម្រៅផ្នែកច្បាប់ចំនួន ៣ សំខាន់ៗ រួមមាន៖

​ការទទួលខុសត្រូវរដ្ឋបាល៖ ប្រសិនបើមានកំហុសបច្ចេកទេសរបស់មន្ត្រីសុរិយោដី ស្ថាប័នគួរកែតម្រូវឯកសារ មិនមែនជាការលុបចោលសិទ្ធិស្របច្បាប់របស់អ្នកទិញដោយសុចរិត (មានប្លង់រឹង) ហើយផ្ទេរទៅឱ្យភាគីម្ខាងទៀត ដែលមានត្រឹមកិច្ចសន្យាទិញលក់ឯកជននោះទេ។

​នីតិវិធីតុលាការ និង រដ្ឋបាល៖ វិវាទកម្មសិទ្ធិគឺស្ថិតក្រោមសមត្ថកិច្ចតុលាការ។ ការផ្ទេរកម្មសិទ្ធិដោយរំលងដីកាសម្រេចរក្សាការពាររបស់តុលាការ ដែលកំពុងមានសុពលភាព គឺជាការអនុវត្តដែលគួរឱ្យសង្ស័យផ្នែកនីតិវិធីច្បាប់។

​ផលប៉ះពាល់ដល់សេដ្ឋកិច្ចជាតិ៖ ភាពអយុត្តិធម៌បែបនេះ អាចធ្វើឱ្យប៉ះពាល់យ៉ាងធ្ងន់ធ្ងរដល់ទំនុកចិត្តរបស់អ្នកវិនិយោគបរទេស ដែលបានលះបង់ទុនរាប់លានដុល្លារមករួមចំណែកអភិវឌ្ឍន៍សេដ្ឋកិច្ចនៅកម្ពុជា។

​អាស្រ័យហេតុនេះ លោក ឆឹង សឺហ្វីង ស្នើសុំយ៉ាងទទូចដល់ ឯកឧត្តមអភិបាលខេត្តកំពង់ស្ពឺ មេត្តាជួយពិនិត្យ និងផ្តល់យុត្តិធម៌ឡើងវិញ តាមរយៈការរក្សាសិទ្ធិស្របច្បាប់របស់លោក។

​បញ្ជាក់៖ អង្គភាពព័ត៌មានយើងខ្ញុំបានត្រឹមតែជាកញ្ចក់ឆ្លុះបញ្ចាំង នាំសារពីបងប្អូនប្រជាពលរដ្ឋទៅថ្នាក់ដឹកនាំរាជរដ្ឋាភិបាល និងនាំសារពីថ្នាក់ដឹកនាំរាជរដ្ឋាភិបាលទៅបងប្អូនប្រជាពលរដ្ឋ។ សូមបញ្ជាក់បន្ថែមថា អង្គភាពព័ត៌មានយើងខ្ញុំរង់ចាំការបកស្រាយបំភ្លឺពីភាគីពាក់ព័ន្ធ រៀងរាល់ម៉ោងនិងពេលវេលាធ្វើការ ស្របតាមច្បាប់ស្តីពីរបបអ្នកសារព័ត៌មាននៃព្រះរាជាណាចក្រកម្ពុជា។

សូមអរគុណ!

 

ផ្សាយ​:ថ្ងៃទី​២២ ខែសីហា​ ឆ្នាំ២០២៦

ដោយ:សៅ​ ​វាសនា​(Harry​VS)