រដ្ឋបាលខណ្ឌជ្រោយចង្វារ បើកកិច្ចប្រជុំគណៈបញ្ជាការឯកភាពប្រចាំខែមិថុនា ដើម្បីពង្រឹងសន្តិសុខ សណ្តាប់ធ្នាប់ និងបង្ក្រាបល្បែងឆបោកតាមអនឡាញ
(រាជធានីភ្នំពេញ)៖ នារសៀលថ្ងៃទី២៩ ខែមិថុនា ឆ្នាំ២០២៦ រដ្ឋបាលខណ្ឌជ្រោយចង្វារ បានរៀបចំកិច្ចប្រជុំគណៈបញ្ជាការឯកភាពរដ្ឋបាលខណ្ឌ ប្រចាំខែមិថុនា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ លោក លីម សុភា អភិបាល នៃគណៈអភិបាលខណ្ឌជ្រោយចង្វារ។ កិច្ចប្រជុំនេះមានការអញ្ជើញចូលរួមពីសំណាក់ថ្នាក់ដឹកនាំខណ្ឌ មន្ត្រីរាជការពាក់ព័ន្ធ កងកម្លាំងប្រដាប់អាវុធ និងអាជ្ញាធរមូលដ្ឋានសង្កាត់ទាំង៥ ក្នុងរចនាសម្ព័ន្ធខណ្ឌ។
ជាកិច្ចចាប់ផ្តើម លោកប្រធានអង្គប្រជុំបានបើកកិច្ចពិភាក្សា និងស្តាប់នូវរបាយការណ៍បូកសរុបលទ្ធផលការងារដែលសម្រេចបានក្នុងខែកន្លងមក ព្រមទាំងលើកទិសដៅការងារបន្ត។ ក្នុងនោះ អង្គប្រជុំបានផ្តោតការយកចិត្តទុកដាក់ខ្ពស់លើរបៀបវារៈសំខាន់ៗ និងបញ្ហាប្រឈមចំពោះមុខមួយចំនួន រួមមាន៖
ការពង្រឹងគោលនយោបាយ «ភូមិ-សង្កាត់មានសុវត្ថិភាព»៖ បន្តជំរុញការការពារសន្តិសុខ សុវត្ថិភាពជូនប្រជាពលរដ្ឋក្នុងមូលដ្ឋាន ឲ្យកាន់តែមានប្រសិទ្ធភាពខ្ពស់។
ការរៀបចំសណ្តាប់ធ្នាប់សាធារណៈ អនាម័យ និងបរិស្ថាន៖ ពង្រឹងការគ្រប់គ្រងសណ្តាប់ធ្នាប់តាមដងផ្លូវ និងការថែរក្សាអនាម័យបរិស្ថាន ដើម្បីលើកកម្ពស់សោភ័ណភាពខណ្ឌ។
ការគ្រប់គ្រងវត្តមានជនបរទេស៖ បង្កើនការត្រួតពិនិត្យ និងគ្រប់គ្រងការស្នាក់នៅរបស់ជនបរទេសក្នុងមូលដ្ឋានឱ្យបានហ្មត់ចត់ស្របតាមច្បាប់។
ការបង្ក្រាបបទល្មើសបច្ចេកវិទ្យា៖ ដាក់ចេញវិធានការម៉ឺងម៉ាត់ក្នុងការបង្ក្រាបល្បែងឆបោកតាមប្រព័ន្ធអនឡាញ (Online Scams) ដែលកំពុងគំរាមកំហែងដល់សន្តិសុខសង្គម។
ការអនុវត្តវិធានការរបស់រាជរដ្ឋាភិបាល៖ ជំរុញការអនុវត្តរាល់បទបញ្ជា និងណែនាំនានារបស់រាជរដ្ឋាភិបាល ឱ្យបានទាន់ពេលវេលា និងមានប្រសិទ្ធភាពខ្ពស់។
មានប្រសាសន៍ដឹកនាំក្នុងកិច្ចប្រជុំនោះដែរ លោក លីម សុភា បានថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំង និងអាជ្ញាធរគ្រប់លំដាប់ថ្នាក់ នាពេលកន្លងមក។ ទន្ទឹមនឹងនោះ លោកអភិបាលខណ្ឌ ក៏បានផ្តល់ការណែនាំបន្ថែមដល់សមាជិកអង្គប្រជុំទាំងអស់ ត្រូវបន្តយកចិត្តទុកដាក់ខ្ពស់ក្នុងការដោះស្រាយរាល់បញ្ហាប្រឈមក្នុងមូលដ្ឋាន ពិសេសត្រូវបង្កើនល្បឿន និងគុណភាពនៃការផ្តល់សេវាសាធារណៈ ឱ្យកាន់តែខិតជិត និងឆ្លើយតបបានទាន់ពេលវេលាទៅនឹងតម្រូវការជាក់ស្តែងរបស់ប្រជាពលរដ្ឋស្របតាមគោលការណ៍ច្បាប់៕
ផ្សាយ:ថ្ងៃទី២៩ ខែមិថុនា ឆ្នាំ២០២៦
ដោយ:សៅ វាសនា(HarryVS)
📷រដ្ឋបាលខណ្ឌជ្រោយចង្វារ
