កិច្ចប្រជុំពិនិត្យវឌ្ឍនភាពការងារសន្តិសុខ សណ្តាប់ធ្នាប់ អនាម័យ និងបរិស្ថាន ក្នុងមូលដ្ឋានខណ្ឌពោធិ៍សែនជ័យ
រាជធានីភ្នំពេញ៖ នៅរសៀលថ្ងៃចន្ទ ៦កើត ខែទុតិយសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២០ ខែកក្កដា ឆ្នាំ២០២៦ វេលាម៉ោង ១៤៖០០នាទី, លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ បានអញ្ជើញជាអធិបតីភាពដ៏ខ្ពង់ខ្ពស់ក្នុង កិច្ចប្រជុំស្តីពីវឌ្ឍនភាពនៃការងារសន្តិសុខ និងការងាររៀបចំសណ្តាប់ធ្នាប់ អនាម័យ បរិស្ថាន នៅក្នុងមូលដ្ឋានខណ្ឌពោធិ៍សែនជ័យ។ កិច្ចប្រជុំនេះ ក៏មានការអញ្ជើញចូលរួមពីថ្នាក់ដឹកនាំ មន្ត្រីរាជការ និងអាជ្ញាធរមូលដ្ឋានពាក់ព័ន្ធជាច្រើនរូបផងដែរ។
ក្នុងកិច្ចប្រជុំដ៏មានសារៈសំខាន់នេះ អង្គប្រជុំបានផ្ដោតការយកចិត្តទុកដាក់ខ្ពស់លើការ៖
- ពិនិត្យវឌ្ឍនភាពការងារកន្លងមក៖ វាយតម្លៃលើលទ្ធផលការងារដែលសម្រេចបាន និងចំណុចខ្វះខាតនានា។
- ពិភាក្សាអំពីបញ្ហាប្រឈម៖ រកដំណោះស្រាយចំពោះឧបសគ្គជាក់ស្តែងដែលកំពុងកើតមានឡើងក្នុងមូលដ្ឋាន។
- កំណត់ទិសដៅការងារបន្ត៖ ពង្រឹងប្រសិទ្ធភាពការងាររក្សាសន្តិសុខ សណ្តាប់ធ្នាប់សាធារណៈ អនាម័យ និងបរិស្ថាន ឱ្យកាន់តែមានប្រសិទ្ធភាពខ្ពស់ សំដៅលើកកម្ពស់សោភ័ណភាព និងសេចក្តីសុខសាន្តជូនប្រជាពលរដ្ឋក្នុងខណ្ឌពោធិ៍សែនជ័យ។
ជាកិច្ចបញ្ចប់ លោក សក់ ច័ន្ទកញ្ញារិទ្ធ អភិបាលខណ្ឌ បានក្រើនរំលឹក និងណែនាំដល់គ្រប់អង្គភាពពាក់ព័ន្ធទាំងអស់ ឱ្យបន្តយកចិត្តទុកដាក់អនុវត្តការងារប្រកបដោយស្មារតីទទួលខុសត្រូវខ្ពស់ ប្រកាន់ខ្ជាប់នូវក្រមសីលធម៌វិជ្ជាជីវៈ ក្នុងការបម្រើផលប្រយោជន៍ជូនប្រជាពលរដ្ឋ និងត្រូវរួមសាមគ្គីគ្នាកសាងខណ្ឌពោធិ៍សែនជ័យឱ្យកាន់តែមាន «សន្តិសុខ សណ្តាប់ធ្នាប់ ស្អាត និងមានបរិស្ថានល្អ» ស្របតាមគោលនយោបាយអភិវឌ្ឍន៍របស់រាជរដ្ឋាភិបាលកម្ពុជា។
