ក្ដីកង្វល់របស់ប្រជាពលរដ្ឋ៖ សំណង់រីសត និងការជីកកកាយដីភ្នំនៅឃុំបឹងព្រាវ អាជ្ញាធរស្រុក-ខេត្ត នៅតែស្ងៀមស្ងាត់មិនផ្ដល់ការបំភ្លឺ
ខេត្តកោះកុង – សកម្មភាពអភិវឌ្ឍន៍សំណង់រីសតចំនួនពីរខ្នង និងការជីកកកាយដីភ្នំទ្រង់ទ្រាយធំនៅតំបន់ជម្រាលភ្នំក្នុងឃុំបឹងព្រាវ ស្រុកស្រែអំបិល កំពុងបង្កឱ្យមានការងឿងឆ្ងល់ និងក្តីកង្វល់យ៉ាងខ្លាំងពីសំណាក់ប្រជាពលរដ្ឋមូលដ្ឋាន។ យោងតាមប្រភពព័ត៌មាន និងភស្តុតាងដែលផ្ដល់ដោយបងប្អូនប្រជាពលរដ្ឋដែលរស់នៅក្បែរទីតាំងកើតហេតុ បានបង្ហាញឱ្យឃើញពីទិដ្ឋភាពនៃការដ្ឋានដែលកំពុងសាងសង់សំណង់រីសតចំនួនពីរខ្នងនៅលើភ្នំ ស្របពេលដែលមានគ្រឿងចក្រធុនធ្ងន់ (អេស្កា) កំពុងធ្វើសកម្មភាពកាយយកដីភ្នំយ៉ាងគឃ្លើន។
ពលរដ្ឋបានលើកឡើងដោយភាពសោកស្ដាយចំពោះការបាត់បង់សោភ័ណភាព និងធនធានធម្មជាតិនៅក្នុងតំបន់របស់ពួកគេ ដោយដាក់ជាសំណួរដ៏ត្រង់ទៅកាន់អាជ្ញាធរថា៖ តើការសាងសង់សំណង់បែបនេះនៅលើជម្រាលភ្នំមានលិខិតអនុញ្ញាតត្រឹមត្រូវដែរឬទេ? ហើយតើការកាយដីភ្នំយកទៅលក់នេះ មានច្បាប់អនុញ្ញាតត្រឹមត្រូវតាមលក្ខន្តិកៈដែរឬយ៉ាងណា?
ក្នុងនាមជាអង្គភាពសារព័ត៌មានដែលមានវិជ្ជាជីវៈ ASEAN DAILY សូមរំលឹកថា ការជីកកកាយដី និងការសាងសង់សំណង់នៅតំបន់ភ្នំ គឺស្ថិតនៅក្រោមការគ្រប់គ្រងយ៉ាងតឹងរ៉ឹងនៃច្បាប់៖
- ច្បាប់ស្តីពីការគ្រប់គ្រងធនធានរ៉ែ៖ រាល់សកម្មភាពជីកកកាយយកដី ឬថ្មលក់ដោយគ្មានអាជ្ញាបណ្ណពីក្រសួងរ៉ែ និងថាមពល គឺជាអំពើខុសច្បាប់ ដែលត្រូវទទួលទោសទណ្ឌយ៉ាងធ្ងន់ធ្ងរ។
- ច្បាប់ស្តីពីការការពារ និងគ្រប់គ្រងបរិស្ថាន៖ ការសាងសង់សំណង់ទ្រង់ទ្រាយធំនៅតំបន់ជម្រាលភ្នំ ដែលគ្មានការសិក្សាផលប៉ះពាល់បរិស្ថាន (EIA) អាចបង្កហានិភ័យដល់ការរអិលបាក់ដី និងការបំផ្លាញប្រព័ន្ធអេកូឡូស៊ី ដែលជាទង្វើផ្ទុយនឹងច្បាប់បរិស្ថាន។
- ច្បាប់ភូមិបាល និងច្បាប់សំណង់៖ ការសាងសង់សំណង់នៅលើទីតាំងដែលមិនត្រូវបានអនុញ្ញាត ឬរំលោភលើដីរដ្ឋ គឺត្រូវប្រឈមនឹងការរុះរើ និងការផាកពិន័យ ឬទោសទណ្ឌតាមផ្លូវច្បាប់ជាធរមាន។
ASEAN DAILY បានព្យាយាមផ្ទៀងផ្ទាត់ និងស្វែងរកការពិតដោយគោរពតាមគោលការណ៍តម្លាភាព៖
- លោកជំទាវ ឈី វ៉ា អភិបាលនៃគណៈអភិបាលខេត្តកោះកុង៖ ក្រុមការងារបានផ្ដល់ព័ត៌មានទៅកាន់អ្នកនាំពាក្យរដ្ឋបាលខេត្ត ដើម្បីស្នើសុំការបំភ្លឺ ប៉ុន្តែទោះបីជាសារត្រូវបានអានរួចរាល់ ក៏មិនមានការឆ្លើយតបណាមួយត្រឡប់មកវិញឡើយ។
- លោក ជា ច័ន្ទកញ្ញា អភិបាលនៃគណៈអភិបាលស្រុកស្រែអំបិល៖ ក្រុមការងារបានព្យាយាមទំនាក់ទំនងតាមប្រព័ន្ធតេឡេក្រាម (Telegram) ផ្ទាល់ទៅកាន់លោកអភិបាលស្រុក ដើម្បីស្នើសុំការបំភ្លឺ ប៉ុន្តែរហូតមកដល់ពេលនេះ ក៏នៅតែគ្មានការឆ្លើយតបពីលោកអភិបាលស្រុកឡើយ។
ភាពស្ងៀមស្ងាត់របស់អាជ្ញាធរគ្រប់លំដាប់ថ្នាក់នៅចំពោះមុខភស្តុតាងជាក់ស្ដែងនេះ កាន់តែធ្វើឱ្យមតិមហាជនងឿងឆ្ងល់ថា តើអាជ្ញាធរមានសមត្ថកិច្ចកំពុងរង់ចាំអ្វី ឬកំពុងរង់ចាំឱ្យការបំផ្លាញធនធានធម្មជាតិឈានដល់កម្រិតណា ទើបមានចំណាត់ការតាមផ្លូវច្បាប់?
ASEAN DAILY សូមអំពាវនាវយ៉ាងទទូចដល់ លោកជំទាវ ឈី វ៉ា អភិបាលនៃគណៈអភិបាលខេត្តកោះកុង និងលោក ជា ច័ន្ទកញ្ញា អភិបាលនៃគណៈអភិបាលស្រុកស្រែអំបិល មេត្តាផ្ដល់ការបំភ្លឺជាសាធារណៈ។ ការផ្សាយរបស់ ASEAN DAILY គ្រាន់តែជាកញ្ចក់ឆ្លុះបញ្ចាំងក្នុងន័យស្ថាបនា ដោយពុំមានចេតនាញុះញង់ទៅលើអង្គភាពណាមួយឡើយ។ យើងខ្ញុំរង់ចាំការបកស្រាយបំភ្លឺពីគ្រប់ស្ថាប័នពាក់ព័ន្ធក្នុងម៉ោងធ្វើការ ស្របតាមក្រមសីលធម៌វិជ្ជាជីវៈសារព័ត៌មាន។
ចុះផ្សាយថ្ងៃទី១១ ខែកក្កដា ឆ្នាំ២០២៦
