(Update)៖ ការបកស្រាយឆ្លើយតបរបស់លោក ព្រុំ បូ និងការបំភ្លឺរបស់រដ្ឋបាលខណ្ឌឫស្សីកែវ ជុំវិញករណីវិវាទដីធ្លី
រាជធានីភ្នំពេញ៖ ឈរលើគោលការណ៍វិជ្ជាជីវៈសារព័ត៌មាន ដែលត្រូវរាយការណ៍ព័ត៌មានឱ្យបានគ្រប់ជ្រុងជ្រោយ និងអព្យាក្រឹត អង្គភាពសារព័ត៌មានយើងខ្ញុំ សូមធ្វើការចុះផ្សាយព័ត៌មានបន្ថែមជុំវិញករណីវិវាទដីធ្លីមួយកន្លែងនៅខណ្ឌឫស្សីកែវ បន្ទាប់ពីមានការចេញសេចក្តីបំភ្លឺពីអាជ្ញាធរខណ្ឌ និងការចេញមុខបកស្រាយឆ្លើយតបពីសំណាក់ប្រជាពលរដ្ឋឈ្មោះ លោក ព្រុំ បូ។
នាពេលថ្មីៗនេះ លោក ព្រុំ បូ បានបង្ហាញឯកសារមួយចំនួន និងបានឆ្លើយតបទៅនឹងការបំភ្លឺរបស់រដ្ឋបាលខណ្ឌ ដោយលោកបានស្នើសុំយ៉ាងទទូចតាមរយៈអង្គភាពសារព័ត៌មានយើងខ្ញុំ ដើម្បីអំពាវនាវសុំការជួយអន្តរាគមន៍រកយុត្តិធម៌ពីថ្នាក់ដឹកនាំកំពូលៗទាំង ៤ រូប រួមមាន៖
១. សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា
២. សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា
៣. ឯកឧត្ដម ឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌
៤. ឯកឧត្ដម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
ដើម្បីឱ្យសាធារណជនទទួលបានព័ត៌មានពីភាគីទាំងសងខាង អង្គភាពយើងខ្ញុំសូមសង្ខេបនូវអំណះអំណាង និងការបំភ្លឺលើចំណុចវិវាទសំខាន់ៗដូចតទៅ៖
ចំណុចវិវាទទី១៖ ការបែងចែកសំណងដី ៤ ឡូត៍ និងជម្លោះបងប្អូនបង្កើត
- ការអះអាងរបស់ភាគីលោក ព្រុំ បូ៖ លោកបានលើកឡើងថា ការដែលអាជ្ញាធរកាត់បែងចែកដីទំហំជាង ១ ម៉ឺនម៉ែត្រការ៉េរបស់លោក ឱ្យនៅសល់ត្រឹមតែ ៤ ឡូត៍ គឺលោកគិតថាហាក់មានភាពមិនប្រក្រតី បើធៀបនឹងអ្នកផ្សេង។ លោកបានបង្ហាញឯកសារកាន់កាប់តាំងពីឆ្នាំ ១៩៩១ មកបញ្ជាក់ពីការកាន់កាប់នេះ។
- ការបំភ្លឺរបស់រដ្ឋបាលខណ្ឌឫស្សីកែវ៖ អាជ្ញាធរបានបញ្ជាក់ថា ការដោះស្រាយប្រគល់ដី ៤ ឡូត៍ គឺបានធ្វើរួចរាល់តាំងពីឆ្នាំ ២០១៦ ប៉ុន្តែលោក ព្រុំ បូ មិនបានបែងចែកដីនេះទៅឱ្យសមាជិកគ្រួសារ។ ហេតុនេះ ប្អូនស្រីបង្កើតរបស់លោកបានប្តឹងផ្តល់រហូតដល់តុលាការកំពូល។ តុលាការបានចេញសាលដីកាស្ថាពរនៅឆ្នាំ ២០២៥ បង្គាប់ឱ្យលោក ព្រុំ បូ ប្រគល់ដី ២ ឡូត៍ទៅឱ្យប្អូនស្រី ដែលការអនុវត្តសាលដីកានេះបានបញ្ចប់ជាស្ថាពរនៅខែមីនា ឆ្នាំ ២០២៦។
ចំណុចវិវាទទី២៖ ភាពពាក់ព័ន្ធរបស់ម្តាយក្មេក (លោកយាយ តាំង ហៃថាំង)
- ការបកស្រាយរបស់លោក ព្រុំ បូ៖ ឆ្លើយតបនឹងចំណុចនេះ លោក ព្រុំ បូ សូមធ្វើការបដិសេធចំពោះការលើកឡើងរបស់រដ្ឋបាលខណ្ឌ។ លោកបានបង្ហាញឯកសារបញ្ជាក់ថា ទីតាំងដីរបស់លោក និងទីតាំងដីរបស់លោកយាយ តាំង ហៃថាំង គឺជាទីតាំងពីរផ្សេងគ្នាដាច់ស្រឡះ ហើយពុំមានការពាក់ព័ន្ធគ្នាសូម្បីតែបន្តិច ដូចការលើកឡើងនោះទេ។
- ការបំភ្លឺរបស់រដ្ឋបាលខណ្ឌឫស្សីកែវ៖ អាជ្ញាធរបានបញ្ជាក់ថា កាលពីខែមេសា ឆ្នាំ ២០២៦ លោកយាយ តាំង ហៃថាំង បានដាក់ពាក្យបណ្តឹងសុំទប់ស្កាត់ការធ្វើប្លង់រឹងលើដី ៤ ឡូត៍នេះ ដោយអះអាងថា អាជ្ញាធរបានប្រគល់ដីសំណងរបស់គាត់ទៅឱ្យគ្រួសារលោក ព្រុំ បូ រួចហើយ តែគាត់ពុំទាន់ទទួលបានចំណែកណាមួយឡើយ ទើបឈានដល់ការប្តឹងទប់ស្កាត់នេះ។
សេចក្តីប្រកាសបញ្ជាក់គោលជំហររបស់អង្គភាពសារព័ត៌មាន៖
អង្គភាពសារព័ត៌មានយើងខ្ញុំ សូមបញ្ជាក់ជាថ្មីជូនសាធារណជន និងអាជ្ញាធរមានសមត្ថកិច្ចថា ការផ្សព្វផ្សាយអត្ថបទនេះ គឺធ្វើឡើងក្នុងគោលបំណងឆ្លុះបញ្ចាំង និងផ្តល់ទំហំព័ត៌មានពិតពីភាគីពាក់ព័ន្ធទាំងសងខាង ក្នុងនាមជាអ្នកសារព័ត៌មានកណ្តាលតែប៉ុណ្ណោះ។ យើងខ្ញុំពុំមានចេតនាញុះញង់ បំផុសបំផុល បង្កការរើសអើង លាបពណ៌ ឬធ្វើឱ្យប៉ះពាល់ដល់កិត្តិយសរបស់ថ្នាក់ដឹកនាំ និងស្ថាប័នរដ្ឋបាលខណ្ឌឫស្សីកែវឡើយ។ អង្គភាពយើងខ្ញុំ រីករាយស្វាគមន៍ជានិច្ច ក្នុងការទទួលរាល់ការបំភ្លឺបន្ថែមពីគ្រប់ស្ថាប័នមានសមត្ថកិច្ច ដើម្បីស្រាយបំភ្លឺជូនមហាជនគ្រប់ពេលវេលា ស្របតាមច្បាប់ស្តីពីរបបសារព័ត៌មាននៃព្រះរាជាណាចក្រកម្ពុជា។
កាលបរិច្ឆេទផ្សាយ៖ ថ្ងៃសៅរ៍ ទី១៥ ខែសីហា ឆ្នាំ២០២៦
