ប្រជាពលរដ្ឋដាក់ការសង្ស័យលើសំណង់រឹងមាំមួយកន្លែង កំពុងសាងសង់កៀកជាប់មាត់ប្រឡាយរំដោះទឹក ក្នុងសង្កាត់ចោមចៅទី២ ខណ្ឌពោធិ៍សែនជ័យ

ភ្នំពេញ៖ ថ្ងៃទី២៦ ខែមិថុនា ឆ្នាំ២០២៦ — យោងតាមសេចក្តីរាយការណ៍ និងការផ្ដល់ព័ត៌មានពីប្រភពប្រជាពលរដ្ឋនៅក្នុងមូលដ្ឋាន បានសម្តែងនូវក្តីបារម្ភ និងដាក់ការសង្ស័យជុំវិញករណីសាងសង់សំណង់រឹងមាំមួយកន្លែង ដែលកំពុងតែដំណើរការរៀបចំជញ្ជាំងឥដ្ឋយ៉ាងប្រកៀក ស្ទើរតែលយជាប់នឹងមាត់ប្រឡាយរំដោះទឹក ស្ថិតនៅក្នុងភូមិសាស្ត្រ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

​ផ្អែកតាមរូបភាពជាក់ស្តែងដែលប្រភពប្រជាពលរដ្ឋបានថតបង្ហើបឱ្យដឹង គេឃើញមានសកម្មភាពសាងសង់ជញ្ជាំងឥដ្ឋពណ៌ក្រហម និងខឿនទប់ដី បង្កើតជាសំណង់រឹងមាំមួយ ដែលមើលទៅមានចម្ងាយកៀកខ្លាំងមែនទែនទៅនឹងមាត់ច្រាំងប្រឡាយ ដែលករណីនេះបានធ្វើឱ្យមជ្ឈដ្ឋានពលរដ្ឋជុំវិញកើតជាសំណួរ និងក្តីព្រួយបារម្ភអំពីបញ្ហាសុវត្ថិភាពផ្លូវទឹកសាធារណៈ។

​ពាក់ព័ន្ធនឹងករណីនេះ បើផ្អែកលើទិដ្ឋភាពច្បាប់ យោងតាម អនុក្រឹត្យលេខ ១៩៨ អនក្រ.បក ស្តីពីការគ្រប់គ្រងដីចំណីឆ្នេរ ដីចំណីទន្លេ ស្ទឹង បឹង ព្រែក អាងទឹក និងប្រឡាយ បានកំណត់យ៉ាងច្បាស់លាស់អំពី «ដីចំណីប្រឡាយសាធារណៈ» ដែលត្រូវរក្សាទុកចម្ងាយគម្លាតសុវត្ថិភាព (ទៅតាមប្រភេទនិងទំហំប្រឡាយមេ ឬប្រឡាយរង) ដើម្បីទុកលទ្ធភាពឱ្យមន្ត្រីបច្ចេកទេសធ្វើការស្តារ ថែទាំ និងរំដោះទឹក ចៀសវាងការលិចលង់ភូមិឋានរបស់ប្រជាពលរដ្ឋ។

​ប្រភពពីប្រជាពលរដ្ឋបានលើកឡើងថា ការសាងសង់ដែលកៀកមាត់ប្រឡាយពេកបែបនេះ អាចនឹងបង្កហានិភ័យដល់ការបាក់ស្រុតច្រាំងប្រឡាយនៅពេលមានភ្លៀងធ្លាក់ខ្លាំង ព្រមទាំងអាចធ្វើឱ្យរួមតូច ឬប៉ះពាល់ដល់ប្រព័ន្ធបង្ហូរទឹកជារួមនៅក្នុងតំបន់នោះផងដែរ។

​ទោះជាយ៉ាងណា នេះគ្រាន់តែជាការលើកឡើង និងជាក្តីកង្វល់ពីសំណាក់ប្រភពព័ត៌មានពីប្រជាពលរដ្ឋតែប៉ុណ្ណោះ។ ក្នុងនាមជាអង្គភាពសារព័ត៌មាន ដែលដើរតួជាកញ្ចក់ឆ្លុះបញ្ចាំងតម្រុយពិតពីសង្គម យើងខ្ញុំសូមរក្សានូវក្រមសីលធម៌វិជ្ជាជីវៈយ៉ាងម៉ឺងម៉ាត់ ដោយមិនធ្វើការសន្និដ្ឋាន ឬចោទប្រកាន់ថា សំណង់ខាងលើនេះមានច្បាប់អនុញ្ញាត ឬខុសច្បាប់កម្រិតណានោះឡើយ ហើយក៏គ្មានចេតនាញុះញង់ ឬបង្ខូចកេរ្តិ៍ឈ្មោះបុគ្គលណាម្នាក់នោះដែរ។

​សេចក្តីរាយការណ៍នេះ គឺធ្វើឡើងក្នុងន័យស្ថាបនា ដើម្បីគោរពស្នើសុំទៅដល់ អាជ្ញាធរមូលដ្ឋានសង្កាត់ចោមចៅទី២ ក៏ដូចជាមន្ត្រីជំនាញនៃសាលាខណ្ឌពោធិ៍សែនជ័យ មេត្តាជួយចុះពិនិត្យជាក់ស្តែង វាស់វែង និងផ្ទៀងផ្ទាត់ផ្លូវច្បាប់ ដើម្បីផ្តល់ភាពស្អាតស្អំដល់ម្ចាស់សំណង់ផង និងដើម្បីធានាការពារដីចំណីប្រឡាយសាធារណៈស្របតាមគោលការណ៍ច្បាប់ផងដែរ។

​អង្គភាពយើងខ្ញុំនឹងរង់ចាំទទួលការបកស្រាយបំភ្លឺពីម្ចាស់សំណង់ ក៏ដូចជាអាជ្ញាធរ និងភាគីពាក់ព័ន្ធគ្រប់ពេលម៉ោង រៀងរាល់ម៉ោងធ្វើការ ដើម្បីឆ្លុះបញ្ចាំងព័ត៌មានឱ្យបានគ្រប់ជ្រុងជ្រោយ និងមានតុល្យភាព។

​(ប្រភពព័ត៌មាន៖ ប្រជាពលរដ្ឋរាយការណ៍)