អង្គភាព ASEAN DAILY បញ្ជាក់ជំហរវិជ្ជាជីវៈ៖ ការផ្សព្វផ្សាយរាល់ក្តីកង្វល់របស់ប្រជាពលរដ្ឋ គឺផ្អែកលើមូលដ្ឋានឯកសារច្បាស់លាស់ និងរក្សាឧត្តមគតិសារព័ត៌មានពិត
(រាជធានីភ្នំពេញ)៖ ឆ្លើយតបទៅនឹងការចេញសេចក្តីបំភ្លឺនានាជុំវិញករណីទំនាស់ដីធ្លីនៅក្នុងប្លុកត្រីកោណ នៃតំបន់អភិវឌ្ឍន៍ឫស្សីកែវ អង្គភាព ASEAN DAILY សូមធ្វើការបញ្ជាក់យ៉ាងម៉ឺងម៉ាត់ជូនសាធារណជន នូវជំហរការងារ និងមូលដ្ឋានគតិយុត្តនៃការផ្សព្វផ្សាយ ក្នុងន័យផ្តល់ព័ត៌មានគ្រប់ជ្រុងជ្រោយ និងប្រកបដោយក្រមសីលធម៌ខ្ពស់៖
១. ការផ្សាយផ្អែកលើភស្តុតាង និងឯកសារផ្លូវការ៖
អង្គភាព ASEAN DAILY សូមជម្រាបជូនថា រាល់ខ្លឹមសារដែលអង្គភាពយើងខ្ញុំបានចុះផ្សាយកន្លងមក គឺធ្វើឡើងដោយស្មោះត្រង់ គ្មានចេតនាបំភ្លៃការពិត ឬបង្កើតព័ត៌មានខ្វះមូលដ្ឋានឡើយ។ រាល់ការផ្សព្វផ្សាយ គឺផ្អែកលើឯកសារគតិយុត្តជាក់ស្តែង និងលិខិតស្នាមផ្សេងៗដែលទទួលបានពីប្រភពបងប្អូនប្រជាពលរដ្ឋ ដែលជាអ្នកអាស្រ័យផលផ្ទាល់លើទីតាំងដីទំនាស់ រួមមាន៖
លិខិតផ្ទេរសិទ្ធិកាន់កាប់ប្រើប្រាស់ដីធ្លី និងផ្ទះសម្បែង ឆ្នាំ១៩៩៣ របស់ម្ចាស់ដើមឈ្មោះ ឌី ប៊ូ។
លិខិតផ្ទេរសិទ្ធិ ឆ្នាំ២០០៥ ដែលមានការដឹងឮពីអាជ្ញាធរភូមិ-សង្កាត់ ក្នុងការលក់បន្តជូនលោកស្រី តាំង ហៃថាំង។
សេចក្តីសម្រេចលេខ ០០៧/១៦ សសរ.អជដ ចុះថ្ងៃទី១៤ ខែមិថុនា ឆ្នាំ២០១៦ របស់អាជ្ញាធរជាតិដោះស្រាយទំនាស់ដីធ្លី ដែលប្រគល់ដីចំនួន ០៤ ឡូតិ៍ (រួមមាន៖ ឡូតិ៍លេខ ៩, ១១, ១៣ ផ្លូវលេខ ៥៩៨ និងឡូតិ៍លេខ ១០ ផ្លូវលេខ ១៧២១) ជូនក្រុមគ្រួសារលោកស្រី តាំង ហៃថាំង។
២. ប្រភពព័ត៌មានផ្ទាល់ពីប្រជាពលរដ្ឋក្នុងតំបន់៖
រាល់ការលើកឡើង ព័ត៌មាន និងមតិកង្វល់នានាដែលអង្គភាពយើងខ្ញុំទទួលបាន គឺចេញមកពីប្រភពបងប្អូនប្រជាពលរដ្ឋដែលរស់នៅ និងមានកម្មសិទ្ធិកាន់កាប់ជាក់ស្តែងនៅលើទីតាំងដីដែលមានទំនាស់នោះឯង។ ក្នុងនាមជាអ្នកសារព័ត៌មាន ការផ្តល់ឱកាសឱ្យប្រជាពលរដ្ឋបានបង្ហាញភស្តុតាង និងការតវ៉ាតាមផ្លូវច្បាប់ គឺជាកាតព្វកិច្ចវិជ្ជាជីវៈ ដើម្បីធានាថា «សំឡេងរបស់ប្រជាពលរដ្ឋត្រូវបានឮដោយសមធម៌»។
៣. ឧត្តមគតិសារព័ត៌មាន និងការមិនវាយប្រហារគ្នា៖
ក្នុងនាមជាអ្នកសារព័ត៌មាន អង្គភាព ASEAN DAILY មិនមានគោលបំណងវាយប្រហារ បង្កើតជម្លោះផ្ទាល់ខ្លួន ញុះញង់ ឬមានការរើសអើងចំពោះបុគ្គល ឬស្ថាប័នណាមួយឡើយ។ ប៉ុន្តែ យើងខ្ញុំសូមបញ្ជាក់ជំហរយ៉ាងច្បាស់ថា ប្រសិនបើមានករណីបោះបង់ចោលឧត្តមគតិវិជ្ជាជីវៈ ផ្សព្វផ្សាយព័ត៌មានដើម្បីតែផលប្រយោជន៍ផ្ទាល់ខ្លួន ហើយជាន់ឈ្លី ឬបំភ្លេចទុក្ខកង្វល់របស់បងប្អូនប្រជាពលរដ្ឋនោះ អង្គភាព ASEAN DAILY របស់យើងខ្ញុំ ដាច់ខាតនឹងមិនសហការជាមួយឡើយ។
យើងខ្ញុំសូមរក្សាជំហរបន្តរាយការណ៍ព័ត៌មានដោយសច្ចធម៌ ឈរលើខែលការពារផ្លូវច្បាប់ និងក្រមសីលធម៌សារព័ត៌មាន ព្រមទាំងបើកចំហរជានិច្ចក្នុងការទទួលយក និងចុះផ្សាយរាល់ការបំភ្លឺបន្ថែមដែលផ្អែកលើអង្គហេតុត្រឹមត្រូវ ពីគ្រប់ភាគីពាក់ព័ន្ធទាំងអស់ ដើម្បីផ្តល់យុត្តិធម៌ពិតប្រាកដជូនសង្គមជាតិ៕
