🚨 ក្ដីព្រួយបារម្ភពីសុវត្ថិភាពអ្នកថ្មើរជើង! ចិញ្ចើមផ្លូវនៅម្ដុំផ្សារទួលពង្រ ត្រូវបានប្រើប្រាស់ជាកន្លែងលក់ដូរ និងចំណតយានយន្ត តើបងប្អូនប្រជាពលរដ្ឋគួរធ្វើដំណើរតាមណា? 🚨

ដោយ អាស៊ាន ដេលី ថ្ងៃទី 24 ខែ ខែកក្កដា ឆ្នាំ 2026 4

គោរពជូន លោក សក់ ចាន់កញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ ជាទីគោរព!

យោងតាមរូបភាពជាក់ស្ដែង និងក្ដីកង្វល់ដែលអង្គភាពព័ត៌មាន ASEAN DAILY ទទួលបានពីសំណាក់បងប្អូនប្រជាពលរដ្ឋនៅមូលដ្ឋាន បានបង្ហាញឱ្យឃើញពីទិដ្ឋភាពនៃការប្រើប្រាស់ចំណីផ្លូវរដ្ឋ និងផ្លូវថ្មើរជើង ធ្វើជាទីតាំងប្រកបអាជីវកម្ម និងជាចំណតយានយន្ត ដែលស្ថិតនៅចំណុចជុំវិញផ្សារទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

តាមរយៈរូបភាពដែលបានផ្តិតយកនេះ បង្ហាញថា ចំណីផ្លូវដែលរៀបចំឡើងសម្រាប់បម្រើប្រយោជន៍សាធារណៈ ត្រូវបានបិទបាំងស្ទើរតែទាំងស្រុង។ សូមជម្រាបជូនថា ទីតាំងនេះគឺជាតំបន់ទីប្រជុំជន ដែលមានទីតាំងក្បែររោងចក្រ និងសាលារៀន ដែលទាមទារឱ្យបងប្អូនកម្មករ-កម្មការិនី សិស្សានុសិស្ស និងប្រជាពលរដ្ឋទូទៅ ត្រូវធ្វើដំណើរថ្មើរជើងឆ្លងកាត់ជាប្រចាំថ្ងៃ។

ការបាត់បង់ទំហំផ្លូវថ្មើរជើងនេះ កំពុងបង្ខំឱ្យបងប្អូនប្រជាពលរដ្ឋគ្មានជម្រើសអ្វីក្រៅពីប្រថុយដើរចុះមកលើទ្រូងផ្លូវ ដែលអាចប្រឈមមុខនឹងគ្រោះថ្នាក់ចរាចរណ៍ជាយថាហេតុគ្រប់វិនាទី។ បញ្ហានេះ មិនត្រឹមតែធ្វើឱ្យប៉ះពាល់ដល់សណ្ដាប់ធ្នាប់ និងសោភណភាពទីក្រុងប៉ុណ្ណោះទេ តែអ្វីដែលជាទីព្រួយបារម្ភបំផុតនោះ គឺហានិភ័យដល់អាយុជីវិតរបស់អ្នកធ្វើដំណើរថ្មើរជើងតែម្ដង។

អាស្រ័យហេតុនេះ ក្នុងនាមជាកញ្ចក់ឆ្លុះបញ្ចាំង និងជាស្ពាននាំសារ អង្គភាពយើងខ្ញុំសូមនាំយកនូវក្ដីកង្វល់នេះ គោរពស្នើសុំដល់ លោក សក់ ចាន់កញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ សូមមេត្តាចាត់មន្ត្រីជំនាញចុះពិនិត្យ និងរៀបចំសណ្ដាប់ធ្នាប់នៅទីតាំងខាងលើឡើងវិញ ដើម្បីសង្គ្រោះផ្លូវថ្មើរជើង ធានាបាននូវសុវត្ថិភាពខ្ពស់ជូនប្រជាពលរដ្ឋ ស្របតាមគោលនយោបាយភូមិ-ឃុំ-សង្កាត់មានសុវត្ថិភាព។ ប្រជាពលរដ្ឋនៅតែមានជំនឿយ៉ាងមុតមាំលើចំណាត់ការរបស់អាជ្ញាធរខណ្ឌជានិច្ច។

ធ្វើនៅរាជធានីភ្នំពេញ, ថ្ងៃសុក្រ ទី២៤ ខែកក្កដា ឆ្នាំ២០២៦

⚠️ សេចក្ដីបញ្ជាក់ពីអង្គភាព៖

អង្គភាពព័ត៌មាន ASEAN DAILY យើងខ្ញុំ គឺជាកញ្ចក់ឆ្លុះបញ្ចាំង និងជាស្ពាននាំសារពីបងប្អូនប្រជាពលរដ្ឋជូនទៅដល់ថ្នាក់ដឹកនាំរាជរដ្ឋាភិបាល ក៏ដូចជានាំសារពីរាជរដ្ឋាភិបាលមកកាន់បងប្អូនប្រជាពលរដ្ឋវិញតែប៉ុណ្ណោះ។ យើងខ្ញុំសូមបញ្ជាក់យ៉ាងច្បាស់ថា អង្គភាពយើងខ្ញុំពុំមានចេតនាញុះញង់ ឬធ្វើឱ្យប៉ះពាល់ដល់សិទ្ធិ និងកិត្តិយសរបស់បុគ្គលណាមួយឡើយ។ អង្គភាពយើងខ្ញុំមានតួនាទីត្រឹមតែជាអ្នកផ្សព្វផ្សាយព័ត៌មាន និងពុំមានសិទ្ធិអំណាចក្នុងការវែកញែកកាត់ក្ដីថាអ្នកណាខុស ឬអ្នកណាត្រូវនោះទេ ពោលគឺទុកភារកិច្ច និងការវិនិច្ឆ័យកិច្ចការងារទាំងនេះ ជូនទៅស្ថាប័នច្បាប់ និងអាជ្ញាធរមានសមត្ថកិច្ចជាអ្នកចាត់វិធានការបន្ត។ សូមអរគុណ!