រឿងកាន់តែធំ!ពលរដ្ឋ២នាក់ចោទបុគ្គលពាក់ឯកសណ្ឋានជាមន្ត្រីថា «លក់ដីខ្យល់» រហូតស្ទើរតែបែកបាក់គ្រួសារ និងប្រុងលោតទឹកសម្លាប់ខ្លួន

(ភ្នំពេញ)៖ ប្រជាពលរដ្ឋចំនួនពីរនាក់បានចេញមុខទម្លាយ និងចោទប្រកាន់លើបណ្តាញសង្គម ករណីចាញ់បោកការទិញ-លក់ដីធ្លីពីបុគ្គលម្នាក់ឈ្មោះ សម សុភាព (ដែលតែងតែបង្ហាញខ្លួនក្នុងឯកសណ្ឋានមន្ត្រី) ដោយពួកគាត់បានបង់ប្រាក់ និងធ្វើកិច្ចសន្យាទិញ-លក់ត្រឹមត្រូវ ប៉ុន្តែរហូតមកដល់ពេលនេះ មិនមានដីជាក់ស្តែងប្រគល់ឱ្យតាមការសន្យានោះទេ។

យោងតាមឯកសារកិច្ចសន្យាទិញ-លក់ និងការរៀបរាប់របស់ជនរងគ្រោះ៖ករណីទី១៖ បានធ្វើកិច្ចសន្យាទិញ-លក់ដីឡូត៍កាលពីចុងឆ្នាំ២០២២ (កិច្ចសន្យាលេខ 001075) ដោយបានប្រគល់ប្រាក់ជាបន្តបន្ទាប់ ប៉ុន្តែភាគីខាងអ្នកលក់ឈ្មោះ សម សុភាព មិនបានប្រគល់ដីឱ្យឡើយ ថែមទាំងគេចវេស ។

ករណីទី២៖ ប្រជាពលរដ្ឋម្នាក់ទៀត (គណនីហ្វេសប៊ុកឈ្មោះ រាជនី ដួងចិត្ត) ក៏បានទម្លាយឯកសារកិច្ចសន្យា (លេខ 001145) និងរូបថតប្រគល់ប្រាក់ ដោយអះអាងថារូបគាត់ក៏ជារងគ្រោះដោយសារការទិញ «ដីខ្យល់» ពីបុគ្គលរូបនេះផងដែរ។

រងវិបត្តិផ្លូវចិត្តធ្ងន់ធ្ងរស្ទើរតែបញ្ចប់ជីវិតការបាត់បង់ទ្រព្យសម្បត្តិដែលខិតខំសន្សំទាំងលំបាកនេះ បានបណ្តាលឱ្យជនរងគ្រោះរងសម្ពាធផ្លូវចិត្តយ៉ាងធ្ងន់ធ្ងរ រហូតកើតមានជម្លោះ និងភាពតានតឹងស្ទើរតែបែកបាក់គ្រួសារ។ លើសពីនេះ ដោយសារតែភាពអស់សង្ឃឹម និងសម្ពាធសេដ្ឋកិច្ច ជនរងគ្រោះថែមទាំងបានព្យាយាមធ្វើអត្តឃាតដោយលោតទឹកសម្លាប់ខ្លួនទៀតផង។

ជុំវិញករណីដ៏ក្តៅគគុកនេះ ប្រជាពលរដ្ឋរងគ្រោះ និងសាធារណជន បានទទូចស្នើសុំយ៉ាងទទូចដល់ នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងអាជ្ញាធរមានសមត្ថកិច្ចបើកការស៊ើបអង្កេតស្រាវជ្រាវអត្តសញ្ញាណពិនិត្យមើលថា តើបុគ្គលឈ្មោះ សម សុភាព ជាមន្ត្រីពិតប្រាកដ ឬជាជនក្លែងបន្លំឯកសណ្ឋានដើម្បីប្រព្រឹត្តបទល្មើសបោកប្រាស់។

ដើម្បីផ្តល់យុត្តិធម៌ ព្រមទាំងចាត់វិធានការតាមផ្លូវច្បាប់យ៉ាងម៉ឺងម៉ាត់ ដើម្បីការពារកិត្តិយសស្ថាប័នអង្គភាព និងទប់ស្កាត់មិនឱ្យមានករណីបែបនេះកើតឡើងបន្តទៀត។