ព័ត៌មានពិសេស] ការបកស្រាយផ្ទាល់មាត់ និងការបង្ហាញឯកសាររបស់ លោក ព្រំ បូ ជុំវិញទំនាស់ដីធ្លីនៅតំបន់អភិវឌ្ឍន៍ឫស្សីកែវ

​រាជធានីភ្នំពេញ៖ អង្គភាពព័ត៌មានយើងខ្ញុំ សូមគោរពជូននូវសេចក្តីរាយការណ៍ព័ត៌មានប្រកបដោយតម្លាភាព សុក្រឹតភាព និងក្រមសីលធម៌វិជ្ជាជីវៈសារព័ត៌មាន ជុំវិញករណីទំនាស់ដីធ្លីស្ថិតនៅក្នុងតំបន់អភិវឌ្ឍន៍ឫស្សីកែវ ភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
​១. សេចក្តីសង្ខេបនៃដើមចោទ និងជំហរតវ៉ារបស់ លោក ព្រំ បូ
​ប្រភពដើមនៃដីធ្លីស្របច្បាប់៖ លោក ព្រំ បូ បានបញ្ជាក់ថា ដីទំហំ ១២,៨០០ ម៉ែត្រការ៉េ (១ ហិចតាជាង) របស់លោក គឺបានទិញយ៉ាងត្រឹមត្រូវពី តាតាម៉ែត មាន និង កាង អ៊ី (នៅភូមិទួលសំពៅ សង្កាត់ទួលសង្កែ) ដោយមានឯកសារទិញលក់ និងការទទួលស្គាល់កាន់កាប់ច្បាស់លាស់។
​មិនពាក់ព័ន្ធនឹងដីភាគីផ្សេង៖ លោកអាះអាងថា ដីរបស់ លោកយាយ តាំង ហៃថាំង (អាយុ ៨៤ ឆ្នាំ) ស្ថិតនៅភូមិបឹងឈូក សង្កាត់គីឡូម៉ែត្រលេខ៦ (លេខកូដដី ២៧៣១៣) គឺជាក្បាលដីផ្សេងដាច់ដោយឡែក។ លោកមិនបានយកឈ្មោះទៅប្រឡាក់ប្រឡូក ឬធ្វើជា «តំណាង» ជំនួសភាគីណាមួយឡើយ। ការដែលមានឈ្មោះលោកពាក់ព័ន្ធ គឺដោយសារលោកយាយ តាំង ហៃថាំង ជាមេម៉ាយវ័យចាស់ និងត្រូវជាម្តាយក្មេក បានស្នើសុំឱ្យលោកជួយឈរឈ្មោះអមជាបណ្តោះអាសន្នប៉ុណ្ណោះ।
​ការទទួលបានដីមិនស្មើភាព៖ លោកមានឯកសារផ្លូវការ តាមសេចក្តីសម្រេច លេខ ០០៧ ចុះថ្ងៃទី១៤ ខែមីនា ឆ្នាំ២០១៦ (ចុះហត្ថលេខដោយ ឯកឧត្តម ជា សុផារ៉ា) ដែលបានប្រគល់ដី ០៤ ឡូត៍ ជូនរូបលោក। ប៉ុន្តែលោកយល់ថាមានភាពមិនស្មើភាព ព្រោះដីដើមរបស់លោកមានរហូតដល់ ១ ហិចតាជាង បែរជាទទួលបានត្រឹមតែ ៤ ឡូត៍ ហើយថែមទាំងត្រូវបានផ្អាកអាជីវកម្មនៅលើទីតាំងនោះទៀត।
​សំណូមពរអំពាវនាវរកយុត្តិធម៌៖ លោកសូមលើកម្រាមដៃដប់ បួងសួង និងគោរពស្នើសុំយ៉ាងទទូចចំពោះ សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត នាយករដ្ឋមន្ត្រី មេត្តាជួយអន្តរាគមន៍ ពិនិត្យមើលឯកសារពិតជាក់ស្តែង ដើម្បីផ្តល់យុត្តិធម៌ជូនរូបលោក និងក្រុមគ្រួសារ।
​២. ខ្លឹមសារដកស្រង់សំឡេង និងការបំភ្លឺផ្ទាល់មាត់ទាំងស្រុងរបស់ លោក ព្រំ បូ
​«ដីនោះគឺខ្ញុំ (ព្រំ បូ) ទិញពី តាតាម៉ែត មាន និង កាង អ៊ី។ ឯកសារទាំងនោះមិនមានការពាក់ព័ន្ធទេ គឺផ្ទុយស្រឡះតែម្ដង. ខ្ញុំចង់បញ្ជាក់ជូនមហាជនមើលថា គឺអត់មានទេ! ដីដែលខ្ញុំទិញ ១០,០០០ ម៉ែត្រការ៉េជាងនោះ គឺដីនេះ. ហើយចំពោះ លោកយាយ តាំង ហៃថាំង គឺដីរបស់គាត់ផ្សេងទេ អត់មានពាក់ព័ន្ធគ្នានៅភូមិបឹងឈូក សង្កាត់គីឡូម៉ែត្រលេខ៦ ទេ. ខ្ញុំនៅភូមិទួលសំពៅ សង្កាត់ទួលសង្កែ នៅម្នាក់មួយចំហៀង.
​ប្រសិនបើចោទថាខ្ញុំជាតំណាង អាជ្ញាធរខណ្ឌយកឯកសារតំណាងនោះចេញមក! ដែលធ្វើឲ្យច្រឡំ គឺលិខិតមួយសន្លឹកដែលទិញជាមួយ ជិន ដេត នោះ. ការនិយាយថាធ្វើឲ្យច្រឡំនោះ តាមពិតវាផ្ទុយគ្នានឹងប័ណ្ណកាន់កាប់ដីរបស់ខ្ញុំដែលបានទិញនេះ សុទ្ធសាធតែម្ដង. ខ្ញុំអត់មានយកឈ្មោះខ្ញុំទៅប្រឡាក់ប្រឡូកជាមួយដីនៅភូមិបឹងឈូក និងលេខកូដដី ២៧៣១៣ ហ្នឹងទេ.
​ខ្ញុំមានដីរបស់ខ្ញុំត្រឹមត្រូវ. អាជ្ញាធរជាតិដោះស្រាយដីធ្លីប្រគល់ឲ្យខ្ញុំត្រឹមត្រូវ ចុះហត្ថលេខដោយ ឯកឧត្តម ជា សុផារ៉ា ឲ្យខ្ញុំ ៤ ឡូត៍ នៅលើដី ១២,៨០០ ម៉ែត្រការ៉េហ្នឹង.
​ខ្ញុំសូមលើកម្រាមដៃដប់ បួងសួងដល់ទេវតា ជួយថែរក្សាក្រុមគ្រួសារសម្ដេចទាំងពីរ (សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត នាយករដ្ឋមន្ត្រី). ខ្ញុំសង្ឃឹមថាសម្ដេចនាយករដ្ឋមន្ត្រី និងសម្ដេចតេជោ មេត្តាចាស់ទុំជួយរកយុត្តិធម៌ឲ្យក្រុមគ្រួសារខ្ញុំផង ដែលរងការអយុត្តិធម៌យ៉ាងខ្លាំង.
​ខ្ញុំមិនអាចទទួលយកបានទេនូវចំណាត់ការផ្អាកការធ្វើអាជីវកម្មរបស់ខ្ញុំនៅលើដីរបស់ខ្ញុំ ដែលមានអនុក្រឹត្យ និង ស.ជ.ណ. លេខ ០០៧ ចុះថ្ងៃទី១៤ ខែមីនា ឆ្នាំ២០១៦ ចេញប្រគល់ដីនោះឲ្យខ្ញុំហើយ. ចុះហេតុអ្វីបានជាដកយកដីខ្ញុំ ១ ហិចតាជាង ឲ្យខ្ញុំតែ ៤ ឡូត៍? អ្វីៗគឺជារឿងអយុត្តិធម៌ចំពោះខ្ញុំបំផុត ហើយឥឡូវនេះមកបិទអាជីវកម្មខ្ញុំទៀត. សូមឲ្យមហាជនពិចារណា មើលអនុក្រឹត្យចេញពីរាជរដ្ឋាភិបាលឲ្យខ្ញុំកាន់កាប់ដី ៤ ឡូត៍នោះ ហើយឥឡូវមកបិទអាជីវកម្មខ្ញុំ ត្រង់ហ្នឹងហើយដែលខ្ញុំមិនសប្បាយចិត្ត. ខ្ញុំសូមជម្រាប និងបកស្រាយដោយស្មោះត្រង់ចំពោះមហាជន គឺសុទ្ធតែជាការពិត និងមានឯកសារយោងច្បាស់លាស់»។
​🏛️ ៣. ការបំភ្លឺបន្ថែមជាផ្លូវការពីរដ្ឋបាលខណ្ឌឫស្សីកែវ (ព័ត៌មានទទួលបាន)
​ជាមួយគ្នានេះដែរ ផ្អែកតាមលិខិតបំភ្លឺរបស់ រដ្ឋបាលខណ្ឌឫស្សីកែវ បានជម្រាបជូនថា៖ ករណីលោក ព្រំ បូ និងក្រុមគ្រួសារ គឺបានបន្តកាន់កាប់ដីនៅក្នុងតំបន់អភិវឌ្ឍន៍ឫស្សីកែវ ស្ថិតក្នុងភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ។
​អាជ្ញាធរខណ្ឌបានបញ្ជាក់ថា បានចេញសេចក្តីជូនដំណឹងចំនួន ១៦ លើក តម្រូវឱ្យរុះរើសំណង់ និងសម្ភារចេញពីលើដីក្នុងប្លុកត្រីកោណ ដោយហេតុថាទីតាំងដីនោះ គឺជាដីដែលត្រូវរៀបចំដោះស្រាយជូនប្រជាពលរដ្ឋផ្សេងទៀតតាមសេចក្តីសម្រេចរបស់រដ្ឋបាលរាជធានីភ្នំពេញ។ រដ្ឋបាលខណ្ឌបានបញ្ជាក់បន្ថែមថា លោក ព្រំ បូ ត្រូវបានអាជ្ញាធរជាតិដោះស្រាយទំនាស់ដីធ្លី ប្រគល់ដីចំនួន ០៤ ឡូត៍រួចរាល់ហើយ តាមសេចក្តីសម្រេចលេខ ០០៧/១៦ ស.ស.រ.អ.ជ.ដ ចុះថ្ងៃទី១៤ ខែមិថុនា ឆ្នាំ២០១៦ (ឡូត៍លេខ ៩, ១១, ១៣ ផ្លូវលេខ ៥៩៨ និងឡូត៍លេខ ១០ ផ្លូវលេខ ១៧២១)។
​លើសពីនេះ រដ្ឋបាលខណ្ឌក៏បានលើកឡើងអំពីករណីទំនាស់បែងចែកដីធ្លីក្នុងគ្រួសារ រវាងលោក ព្រំ បូ ជាមួយប្អូនស្រី (លោកស្រី ព្រំ អូន) តាមអំណាចសាលដីកាតុលាការកំពូល លេខ ៣១២ (ផ) ចុះថ្ងៃទី៣០ ខែកញ្ញា ឆ្នាំ២០២៥ ព្រមទាំងពាក្យបណ្តឹងសុំទប់ស្កាត់ការធ្វើប័ណ្ណកម្មសិទ្ធិពីសំណាក់លោកស្រី តាំង ហៃថាំង ត្រូវជាម្តាយក្មេក ចុះថ្ងៃទី០៦ ខែមេសា ឆ្នាំ២០២៦ ផងដែរ។
​អង្គភាពព័ត៌មានយើងខ្ញុំ សូមធ្វើការផ្សព្វផ្សាយនូវរាល់ការបកស្រាយ និងជំហររបស់ភាគី លោក ព្រំ បូ ព្រមទាំងលិខិតបំភ្លឺពីរដ្ឋបាលខណ្ឌ ប្រកបដោយអព្យាក្រឹតភាព ដើម្បីជូនមហាជន និងថ្នាក់ដឹកនាំជ្រាបជាព័ត៌មាន។

​