[សេចក្ដីរាយការណ៍ព័ត៌មាន] ពលរដ្ឋមានមន្ទិលសង្ស័យ ជុំវិញករណីសាងសង់របងបេតុងរឹងមាំរំលោភយកដីចំណីច្រាំងទន្លេយ៉ាងរលូន នៅឃុំពុកឫស្សី
កាលបរិច្ឆេទផ្សាយ៖ ថ្ងៃពុធ ទី៩ ខែកញ្ញា ឆ្នាំ២០២៦
សូមគោរពជូន៖
- ឯកឧត្តមអភិបាល នៃគណៈអភិបាលខេត្តកណ្ដាល
- លោកអភិបាល នៃគណៈអភិបាលស្រុកខ្សាច់កណ្ដាល
- លោកប្រធានមន្ទីរធនធានទឹក និងឧតុនិយមខេត្តកណ្ដាល
កម្មវត្ថុ៖ សេចក្ដីរាយការណ៍ និងសំណើសុំកិច្ចអន្តរាគមន៍ពីមន្ត្រីជំនាញ ចុះស្រាវជ្រាវ និងត្រួតពិនិត្យឯកសារពាក់ព័ន្ធ ករណីមានការសាងសង់របងបេតុងបុកគ្រឹះរឹងមាំរួចជាស្ថាពរ រំលោភយកដីចំណីច្រាំងទន្លេធ្វើជាកម្មសិទ្ធិផ្ទាល់ខ្លួន ស្ថិតនៅឃុំពុកឫស្សី ស្រុកខ្សាច់កណ្ដាល ខេត្តកណ្ដាល។
យោងតាមលិខិតបទដ្ឋានគតិយុត្ត៖
- ច្បាប់ភូមិបាល ឆ្នាំ២០០១ (មាត្រា១៥ និងមាត្រា១៦) ស្ដីពីទ្រព្យសម្បត្តិសាធារណៈរបស់រដ្ឋ។
- ច្បាប់ស្ដីពីការគ្រប់គ្រងធនធានទឹក នៃព្រះរាជាណាចក្រកម្ពុជា (មាត្រា៨ និងមាត្រា៣៦)។
- អនុក្រឹត្យ និងសារាចរណែនាំរបស់រាជរដ្ឋាភិបាល ស្ដីពីការទប់ស្កាត់ការរំលោភដីចំណីមាត់ទន្លេ ស្ទឹង ព្រែក បឹងបួ និងអាងស្តុកទឹក។
តបតាមកម្មវត្ថុ និងយោងខាងលើ ដោយឈរលើក្រមសីលធម៌វិជ្ជាជីវៈសារព័ត៌មាន ក្នុងការចូលរួមចំណែកការពារទ្រព្យសម្បត្តិរដ្ឋ អង្គភាពយើងខ្ញុំសូមគោរពរាយការណ៍ជូន ឯកឧត្តមអភិបាលខេត្ត លោកអភិបាលស្រុក និងលោកប្រធានមន្ទីរ មេត្តាជ្រាបថា៖ ការផ្សាយនេះធ្វើឡើងក្នុងស្មារតីស្ថាបនា ដោយពុំមានចេតនារិះគន់ ឬវាយប្រហារលើការបំពេញការងាររបស់អាជ្ញាធរគ្រប់លំដាប់ថ្នាក់ឡើយ។
ជាក់ស្ដែង ផ្អែកតាមប្រភពព័ត៌មានពីប្រជាពលរដ្ឋនៅមូលដ្ឋានបានឱ្យដឹងថា មានទីតាំងមួយកន្លែងនៅឃុំពុកឫស្សី ស្រុកខ្សាច់កណ្ដាល ដែលម្ចាស់ទីតាំងត្រូវគេស្គាល់ថាជាបុគ្គលមានធនធាន និងមានតួនាទី បានធ្វើសកម្មភាពចាក់ដី បុកគ្រឹះយ៉ាងរឹងមាំ និងសាងសង់របងព័ទ្ធយកដីចំណីច្រាំងទន្លេធ្វើជាកម្មសិទ្ធិផ្ទាល់ខ្លួន ដែលបច្ចុប្បន្នការសាងសង់នេះត្រូវបានធ្វើរួចរាល់ជាស្ថាពរ។ យោងតាមប្រភពដដែលបានបញ្ជាក់ទៀតថា នៅក្នុងតំបន់នេះទាំងមូល គឺមានតែទីតាំងមួយកន្លែងនេះប៉ុណ្ណោះ ដែលបានធ្វើរបងលយចូលរំលោភលើដីចំណីទន្លេយ៉ាងច្បាស់ក្រឡែត។
ករណីនេះ គឺផ្ទុយទៅនឹងច្បាប់នៃព្រះរាជាណាចក្រកម្ពុជាយ៉ាងស្រឡះ។ យោងតាម ច្បាប់ភូមិបាល មាត្រា១៥ និងមាត្រា១៦ បានចែងយ៉ាងច្បាស់ថា ចំណីមាត់ទឹក គឺជា “ទ្រព្យសម្បត្តិសាធារណៈរបស់រដ្ឋ” ដែលមិនអាចក្លាយជាកម្មវត្ថុនៃការទាមទារកម្មសិទ្ធិ ឬលក់ដូរបានឡើយ។ ស្របគ្នានេះដែរ ច្បាប់ស្ដីពីការគ្រប់គ្រងធនធានទឹក មាត្រា៨ បានបញ្ញត្តថា ចំណីច្រាំងទន្លេ គឺជាទ្រព្យសម្បត្តិរបស់រដ្ឋ ហើយយោងតាម មាត្រា៣៦ រាល់សកម្មភាពកែប្រែស្ថានភាពចំណីមាត់ទន្លេ ឬសាងសង់សំណង់រឹងមាំ ត្រូវមានការអនុញ្ញាតត្រឹមត្រូវ។ បន្ថែមពីនេះ អនុក្រឹត្យ និងសារាចរណែនាំ ក៏បានហាមឃាត់យ៉ាងម៉ឺងម៉ាត់ ចំពោះការរំលោភបំពានយកដីចំណីទន្លេ ដែលប៉ះពាល់ដល់ប្រព័ន្ធផ្លូវទឹក និងបរិស្ថានសាធារណៈ។
ទន្ទឹមនឹងនេះ បងប្អូនប្រជាពលរដ្ឋនៅមូលដ្ឋានបានលើកឡើងជាសំណួរដោយក្ដីកង្វល់ថា៖ “សម្រាប់ប្រជាពលរដ្ឋសាមញ្ញទូទៅ ទោះបីជាចង់សាងសង់លយចូលដីចំណីទន្លេបន្តិចបន្តួច ក៏ពុំអាចធ្វើបានឡើយ។ ប៉ុន្តែហេតុអ្វីបានជាម្ចាស់ទីតាំង ដែលគេស្គាល់ថាជាបុគ្គលមានធនធាន និងតួនាទីខាងលើនេះ អាចសាងសង់របងបេតុងរឹងមាំរំលោភយកដីចំណីទន្លេបានដោយរលូន និងសេរីយ៉ាងដូច្នេះទៅវិញ? តើការសាងសង់នេះមានលិខិតអនុញ្ញាតត្រឹមត្រូវពីមន្ទីរជំនាញដែរឬទេ?”។ ការលើកឡើងនេះ គឺគ្រាន់តែជាការទាមទារនូវភាពស្មើគ្នា និងតម្លាភាពចំពោះមុខច្បាប់តែប៉ុណ្ណោះ។
អាស្រ័យហេតុនេះ ដើម្បីលុបបំបាត់នូវមន្ទិលសង្ស័យរបស់មហាជន ក៏ដូចជាថែរក្សាការពារដីចំណីទន្លេ អង្គភាពសារព័ត៌មានយើងខ្ញុំ សូមសំណូមពរយ៉ាងទទូចដល់ ឯកឧត្តមអភិបាលខេត្ត លោកអភិបាលស្រុក និងលោកប្រធានមន្ទីរធនធានទឹក មេត្តាចាត់មន្ត្រីជំនាញចុះត្រួតពិនិត្យទីតាំងជាក់ស្ដែង និងស្រាវជ្រាវរកឯកសារពាក់ព័ន្ធនឹងការសាងសង់របស់ម្ចាស់ទីតាំងខាងលើ ថាតើមានច្បាប់អនុញ្ញាតត្រឹមត្រូវដែរឬទេ។ ក្នុងករណីពុំមានឯកសារផ្លូវច្បាប់ណាមួយអនុញ្ញាត សូមថ្នាក់ដឹកនាំ និងមន្ត្រីជំនាញពាក់ព័ន្ធ មេត្តាចាត់វិធានការតាមនីតិវិធីច្បាប់ដោយតម្លាភាព ដើម្បីជាប្រយោជន៍ដល់សង្គមជាតិទាំងមូល។
បញ្ជាក់៖ អង្គភាពព័ត៌មានយើងខ្ញុំ ត្រឹមតែជាកញ្ចក់ឆ្លុះបញ្ចាំង និងជាស្ពាននាំសារពីបងប្អូនប្រជាពលរដ្ឋគោរពជូនទៅកាន់ថ្នាក់ដឹកនាំរាជរដ្ឋាភិបាល ក៏ដូចជានាំសារពីថ្នាក់ដឹកនាំរាជរដ្ឋាភិបាលជូនមកប្រជាពលរដ្ឋវិញតែប៉ុណ្ណោះ។ ស្របតាមច្បាប់របបសារព័ត៌មាន អង្គភាពយើងខ្ញុំរង់ចាំស្វាគមន៍ជានិច្ច នូវការបកស្រាយបំភ្លឺពីគ្រប់ភាគីពាក់ព័ន្ធ ទាំងមន្ត្រីអាជ្ញាធរជំនាញ និងម្ចាស់ទីតាំងដែលកំពុងសាងសង់នេះផ្ទាល់ គ្រប់កាលៈទេសៈ តាមរយៈប្រព័ន្ធផ្សព្វផ្សាយរបស់យើងខ្ញុំ។
សូម ឯកឧត្តម លោកអភិបាល និងលោកប្រធាន មេត្តាទទួលនូវការគោរពដ៏ខ្ពង់ខ្ពស់។ សូមអរគុណ!
