​🚨 តើអាថ៌កំបាំងអ្វីនៅពីក្រោយឃ្លាំងអេតចាយដ៏ធំមហិមាគ្មានស្លាកយីហោនៅស្រុកលើកដែក? ឃ្លាំងខ្នាតយក្សចំនួន ២ កន្លែង ធ្វើសកម្មភាពដឹកជញ្ជូនដែកអេតចាយទាំងយប់ទាំងថ្ងៃតាមផ្លូវទឹកទៅប្រទេសវៀតណាមយ៉ាងគគ្រឹកគគ្រេង! ប្រជាពលរដ្ឋទទូចសុំឱ្យអាជ្ញាធរជួយត្រួតពិនិត្យភាពស្របច្បាប់ ខណៈក្រុមការងារសារព័ត៌មានរង់ចាំការឆ្លើយតបបំភ្លឺជិតមួយសប្ដាហ៍ហើយ នៅតែស្ងាត់ជ្រងំ…

ប្រជាពលរដ្ឋស្នើសុំរដ្ឋបាលខេត្តកណ្ដាល និងរដ្ឋបាលស្រុកលើកដែក ជួយចុះត្រួតពិនិត្យទីតាំងឃ្លាំងស្តុក និងផ្ទេរដែកអេតចាយខ្នាតធំគ្មានស្លាកយីហោ ខណៈក្រុមការងារសារព័ត៌មានដាក់សំណួររង់ចាំការបំភ្លឺជិតមួយសប្ដាហ៍ នៅពុំទាន់មានការឆ្លើយតប

ផ្សាយចេញថ្ងៃទី២០.ខែតុលា ឆ្នាំ២០២៦
​(ខេត្តកណ្ដាល)៖ ប្រជាពលរដ្ឋរស់នៅក្នុងមូលដ្ឋានបានសម្ដែងនូវក្ដីកង្វល់ និងសំណូមពរដល់អាជ្ញាធរមានសមត្ថកិច្ចពាក់ព័ន្ធ មេត្តាជួយចុះត្រួតពិនិត្យទីតាំងឃ្លាំងស្តុក និងផ្ទេរដែកអេតចាយខ្នាតធំចំនួន ២ កន្លែង ដែលកំពុងដំណើរការយ៉ាងគគ្រឹកគគ្រេងតាមផ្លូវទឹកឆ្ពោះទៅកាន់ប្រទេសវៀតណាម ប៉ុន្តែពុំមានដាក់ស្លាកយីហោសម្គាល់ឈ្មោះអាជីវកម្ម ឬក្រុមហ៊ុនឱ្យបានត្រឹមត្រូវស្របតាមផ្លូវច្បាប់នោះឡើយ។
​យោងតាមការចុះពិនិត្យ និងស្រាវជ្រាវជាក់ស្ដែងរបស់ក្រុមការងារអង្គភាពសារព័ត៌មាន អាស៊ាន ដេលី (ASEAN DAILY) កាលពីវេលាម៉ោង ៩:១១ នាទីព្រឹក ថ្ងៃទី១៥ ខែតុលា ឆ្នាំ២០២៦ នៅតាមបណ្ដោយផ្លូវលេខ២១កេ (21K) ស្ថិតក្នុងឃុំព្រែកទន្លាប់ ស្រុកលើកដែក ខេត្តកណ្ដាល បានរកឃើញថា៖
​នៅទីតាំងខាងលើ មានសំណង់អគារឃ្លាំងស័ង្កសីពណ៌ខៀវដ៏ធំមហិមាចំនួន ២ ទីតាំង ដោយគ្មានការបំពាក់ស្លាកយីហោសម្គាល់អាជីវកម្មស្របច្បាប់ឡើយ។
​តាមប្រភពពីប្រជាពលរដ្ឋក្នុងមូលដ្ឋានបានឱ្យដឹងថា ឃ្លាំងទាំងពីរនេះមានម្ចាស់ជាជនជាតិវៀតណាម ដោយធ្វើសកម្មភាពប្រមូលទិញ និងស្តុកទុកដែកអេតចាយក្នុងបរិមាណយ៉ាងច្រើនសន្ធឹកសន្ធាប់។
​បន្ទាប់ពីប្រមូលស្តុកទុក មានសកម្មភាពដឹកជញ្ជូននិងផ្ទេរចេញយ៉ាងគគ្រឹកគគ្រេងទាំងយប់ទាំងថ្ងៃតាមផ្លូវទឹក ឆ្ពោះទៅកាន់ប្រទេសវៀតណាម។
​ដើម្បីធានានូវតម្លាភាព ភាពត្រឹមត្រូវ និងវិជ្ជាជីវៈសារព័ត៌មាន ក្រុមការងារអង្គភាពសារព័ត៌មាន អាស៊ាន ដេលី (ASEAN DAILY) បានរៀបចំសេចក្ដីរាយការណ៍ និងដាក់សំណួរសាកសួរជាផ្លូវការតាមរយៈទំព័រហ្វេសប៊ុកផ្លូវការ ទៅកាន់រដ្ឋបាលខេត្តកណ្ដាល និងរដ្ឋបាលស្រុកលើកដែក ចាប់តាំងពីថ្ងៃទី១៥ ខែតុលា ឆ្នាំ២០២៦ មកម្ល៉េះ ដើម្បីស្នើសុំការពិនិត្យ ស្រាវជ្រាវ និងផ្ទៀងផ្ទាត់ថាតើទីតាំងអាជីវកម្មខាងលើនេះមានច្បាប់អនុញ្ញាតត្រឹមត្រូវដែរឬទេ។
​យ៉ាងណាមិញ គិតចាប់តាំងពីថ្ងៃទី១៥ រហូតមកទល់នឹងថ្ងៃទី២០ ខែតុលា ឆ្នាំ២០២៦ នេះ ដែលមានរយៈពេលប្រមាណពី ៥ ទៅ ៦ ថ្ងៃកន្លងផុតទៅហើយនោះ អង្គភាពសារព័ត៌មាននៅពុំទាន់ទទួលបានការឆ្លើយតប ការបំភ្លឺ ឬចំណាត់ការណាមួយពីខាងរដ្ឋបាលខេត្តកណ្ដាល ក៏ដូចជារដ្ឋបាលស្រុកលើកដែកនៅឡើយទេ។
​អង្គភាពសារព័ត៌មានយើងខ្ញុំនៅតែបន្តរក្សាជំហរបើកទូលាយ និងរង់ចាំការបកស្រាយ បំភ្លឺ ពីគ្រប់ភាគីពាក់ព័ន្ធទាំងអស់ ដើម្បីផ្ដល់ព័ត៌មានពិតជូនសាធារណជនប្រកបដោយតុល្យភាពព័ត៌មាន។ រាល់ការបំភ្លឺ ឬផ្ដល់ព័ត៌មានបន្ថែម ភាគីពាក់ព័ន្ធអាចទំនាក់ទំនងមកកាន់អង្គភាពព័ត៌មានយើងខ្ញុំតាមរយៈលេខទូរស័ព្ទ ឬតេឡេក្រាម៖ ០១២ ៧៣០ ១១៨ និង ០៧១ ៦០០០ ២២៩ រៀងរាល់ម៉ោងធ្វើការ៕